Հանրապետական խմբակցությունն ամենայն հավանականությամբ այսօր նորից կբոյկոտի ոչ իշխանական ուժերի հրավիրած արտահերթ նիստը, ինչպես բոյկոտեց երեկ «Օրինաց երկիր» խմբակցության նախաձեռնությունը:
ՀՀԿ խմբակցության ղեկավար Վահրամ Բաղդասարյանը «Առաջին լրատվական»-ի հետ զրույցում թեև միանշանակ չպնդեց, որ բոյկոտելու են, բայց միաժամանակ հավելեց, որ իրենք արտահերթ նիստ անցկացնելու որոշում չունեն:
Հիշեցնենք, որ ոչ իշխանական խմբակցությունները այդ նիստը հրավիրել էին՝ քննարկելու համար «Շրջանառության հարկի մասին» օրենքում փոփոխությունների հարցը: Նրանք այդ օրենքում փոփոխություններ էին առաջարկում՝ ելնելով հասարակական դժգոհություններից: Հոկտեմբերի 1-ից ուժի մեջ է մտնում այդ նույն օրենքում կառավարության առաջարկությամբ կատարված մի փոփոխություն, որը փոքր ու միջին բիզնեսին պարտադրում է ապրանքաշրջանառության համար փաստաթուղթ ներկայացնել հարկային մարմիններին: Մինչդեռ առևտրականները դժգոհում են, որ խշոր ներկրողներն իրենց վաճառած ապրանքի դիմաց փաստաթուղթ չեն տրամադրում, որ իրենք էլ դա ներկայացնեն հարկային մարմիններին: Եվ ոչ իշխանական խմբակցությունները որոշակի լուծում էին առաջարկում իրենց նախագծով:
Վ. Բաղդասարյանը մեզ հետ զրույցում ասեց, որ երկու օր է, ինչ ոչ իշխանական խմբակցությունների ներկայացուցիչների հետ քննարկում են, թե ինչ լուծումներ կարելի է գտնել, բայց այդ ուժերը քննարկումներից զատ՝ արտահերթ նիստ են հրավիրել:
Վ. Բաղդասարյանը կարծում է, որ «Շրջանառության հարկի մասին» օրենքը հոկտեմբերի 1-ից պետք է սկսի գործել, իսկ եթե խոշոր բիզնեսի ներկայացուցիչներն իրենց շուկա հանդիսացող փոքր բիզնեսին փաստաթուղթ չեն տրամադրի, արդեն կառավարությունը գիտի նրանց հարկման դաշտ բերելու ճանապարհները:
«Օրենքը թող սկսի աշխատել, և եթե խոշորը փաստաթուղթ չի տրամադրի, դա կառավարության խնդիրն է, կառավարությունը թող զբաղվի խոշորներով: Ի՞նչ է, այս երկրում եթե խոշորը ներկրում է կատարում, փաստաթուղթ չի՞ տրամադրում: Թող գնան խնդիրը լուծեն խոշորների հետ, ինչո՞ւ են հարվածը վերցնում իրենց վրա»,- ասաց Վ. Բաղդասարյանը: