Ֆրանսիացի ինժեներները յուրօրինակ ռոբոտ-մանեկեն են մշակել, հայտնում է ITAR-TASS-ը: «Վի-Ջոն» անունը ստացած սարքը կարողանում է տեսնել անցորդների՝ իր վրա ուղղված հայացքներն ու նրանց հետևից գլուխը թեքել, ի պատասխան ժպտալ կամ աչքով անել:
«Զգացումների նմանակման էլեկտրոնային համակարգով, այսինքն՝ արհեստական ինտելեկտով մեր ռոբոտի գործողությունները կախված կլինեն իրեն անցորդների արձագանքից»,- վստահեցնում են հեղինակները:
«Վի-Ջոնից» բացի՝ հեղինակները շուտով կներկայացնեն նաև նրա «ընկերուհուն»՝ «Վի-Մերիին»:
Ռոբոտները մշակել է Syntheligence ընկերությունը: Ներկայումս ռոբոտներից մեկը փորձարկվում է Փարիզի խոշորագույն «Պիտյե-Սալպետրիեր» հոսպիտալում, որտեղ դրա ստեղծողները մտադիր են այն հարմարեցնել վարքագծային խանգարումներով մարդկանց, նաև ծերերի հետ շփման:
Ինժեներները կարծում են, որ հետագայում ռոբոտը, կախված իրավիճակից, ունակ կլինի կարմրել կամ գունատվել, նույնիսկ լաց լինել: Չի բացառվում, որ էլեկտրոնիկայի բուռն զարգացումը սարքին խոսելու հնարավորություն տա:
