Օրերս Փարիզի նորաձևության շաբաթվա շրջանակում ֆրանսիացի մոդելավորող Ժան-Պոլ Գոտիեն ներկայացրեց ready-to-wear շարքի իր վերջին հավաքածուն: Հրաժեշտի ժամանակ դիզայները ցուցադրեց հերթական անմոռանալի շոուն, հայտնում է cosmo.com.ua-ն:
Դիզայները նորաձևություն մտցրեց նավաստու գծերով հագուստները, կորսետները և ավելի քան 30 տարի զարմացնում էր հանդիսատեսին իր սադրիչ հավաքածուներով, սակայն ներկայումս նրա կյանքում նոր փուլ է սկսվում:
Դիզայները հայտնել է ready-to-wear հագուստի շարքի փակման մասին, որպեսզի կենտրոնանա օծանելիքների թողարկման ու կուտուրիեների զգեստների վրա:
Հրաժեշտին դիզայները հանդիսատեսին պարգևեց վառ շոու, որտեղ նորովի ներկայացրեց իր ամենահայտնի ստեղծագործությունները:
Գոտիեն ցուցադրությունը վերածեց գեղեցկության մրցույթի ու հավաքածուն բաժանեց մի քանի մասի:
Դիզայների ցուցադրությանը ներկա էին մեծաթիվ հյուրեր, այդ թվում՝ դիզայներներ: Մասնավորապես, իրենց գործընկերոջը աջակցելու էին եկել Ռիկ Օուենսը, Պիեռ Կարդենը, Ալեքսանդր Վենգը, Ալբեր Էլբասն ու Ջերեմի Սքոթը:
«Հնարավոր է՝ նորաձևության աշխարհը տխրում է այդ առիթով, սակայն նրա համար դա երջանկություն է: Ու եթե նա ուրախ է, ապա մենք կկարողանանք դա ապրել»,- ասել է Lanvin ապրանքանիշի դիզայներ Ալբեր Էլբազը: