Հանրապետական խմբակցության պատգամավոր Առաքել Մովսիսյանը այսօր Ազգային ժողովում լրագրողների հետ զրույցում հայտարարեց, թե իշխանությունների հետ պահանջով չի կարելի խոսել։ Խոսքը տվյալ դեպքում վերաբերում է ոչիշխանական քառյակի՝ իշխանություններին առաջադրված 12 կետից բաղկացած պահանջների կատարմանը։ Քառյակը որպես այդ պահանջների կատարման ժամկետ նշել էր սեպտեմբերի 30-ը, այսինքն՝ մինչև այսօր։ Արդյոք իշխանությունները կատարե՞լ են այդ պահանջները։
Ա.Մովսիսյանը բարկացավ նաև ՀԱԿ խմբակցության քարտուղար Արամ Մանուկյանի վրա, որը Աբովյան քաղաքում եռյակի հանրահավաքի ժամանակ կոշտ արտահայտություններ էր արել իշխանությունների ու Սերժ Սարգսյանի հասցեին: Բայց չէ՞ որ Ա.Մովսիսյանն ինքն էլ հաճախ ԱԺ դահլիճում ու միջանցքներում հայհոյում է ընդդիմադիր պատգամավորներին։ «Պետք լինի՝ նորից կհայհոյեմ։ Ես մարդկանց եմ հայհոյում, ոչ թե երկրի նախագահին ու դրոշին»,- բարկացած նետեց Ա.Մովսիսյանն ու դուռը շրխկացրեց լրագրողների վրա։
