Հանրապետական խմբակցության պատգամավոր, «Հրազդան» տոնավաճառի սեփականատեր Աշոտ Աղաբաբյանը բարկացավ լրագրողների վրա, երբ նրան հարց տվեցին «Շրջանառության հարկի մասին» օրենքից դժգոհ՝ մանր ու միջին ձեռներեցների մասին: Վերջիններս այսօր իրենց բողոքի ակցիան շարունակում էին Ազգային ժողովի դարպասների մոտ: «Այսինքն՝ դուք ժուռնալիստներով այնքան խելոք եք, այնքան իրենց կողմից եք, մենք էլ դեմ ենք, հա՞, էդ ամեն ինչին»,- բարկացած ասաց Ա.Աղաբաբյանը:
Հիշեցնենք, որ «Շրջանառության հարկի մասին» օրենքում կառավարության կատարած փոփոխությունից հետո այդ հարկատեսակը թեև 3,5 տոկոսից իջավ 1 տոկոսի, բայց միաժամանակ ներդրվեց փաստաթղթաշրջանառության մեխանիզմը, ինչից էլ դժգոհ են մանր ու միջին ձեռներեցները, որոնցից շատերը տոնավաճառներում առևտուր կազմակերպողներ են: Նրանք դժգոհում են, որ խոշոր ներկրողը, ումից իրենք ապրանք են գնում և տոնավաճառներում կամ խանութներում վերավաճառում, իրենց փաստաթուղթ չի տրամադրում, որպեսզի իրենք էլ իրենց հերթին ապրանքի ծագման մասին փաստաթուղթ ներկայացնեն հարկային մարմիններին:
«Ժողովուրդը սխալ ճանապարհ է գնում: Մենք իրենց բացատրում ենք, որ չի կարելի ընկնել ընդդիմության խելքի հետևից: Ընդդիմությունն այսօր ուզենա՝ ամբողջ ժողովրդին կհանի, ինչ է թե՝ ինքը նորից գա իշխանության»,- ասում է Ա.Աղաբաբյանը:
Բայց այս հարցում ի±նչ կապ ունի ընդդիմությունը, չէ՞ որ այդ մարդիկ իրենց շահերի համար են ոտքի ելել: «Ընդդիմությունն է փողոց հանում մարդկանց, մարդիկ հանգիստ պիտի նստեն իրենց տեղերը, մինչև խնդրին լուծում տանք»,- պատասխանեց Ա.Աղաբաբյանը:
Վարչապետ Հովիկ Աբրահամյանը դժգոհող ձեռներեցների հետ հանդիպման ժամանակ ասել էր, թե իրենց թիրախը խոշոր բիզնեսն է, և փոքր բիզնեսը փաստաթղթավորելով՝ իրենք ցանկանում են խոշորին հարկային դաշտ բերել: «Ում դեմ ուզում են՝ թող պայքարեն, խնդիրն այն է, որ ով ունի ապրանք վաճառելու, պետք է փաստաթուղթ ունենա: Այդ խնդիրը պետք է լուծվի»,- ասաց Ա.Աղաբաբյանը:
Բայց չէ՞ որ խոշոր բիզնեսն էլ շատ դեպքերում գտնվելով արտոնյալ վիճակում՝ փաստաթուղթ չի ներկայացնում ո՛չ հարկային մարմնին, ոչ էլ իր գնորդ փոքր ու միջին բիզնեսին: Եվ արդյոք կառավարությունը չգիտի՞ խոշորի տեղը, որ փոքրերի միջոցով է ցանկանում նրանց օրինական դաշտ բերել: «Չեն տալիս՝ պիտի պատժվեն»: Շատ էլ լավ գիտի, թող գտնի»,- պատասխանեց Ա.Աղաբաբանը:
