Մարտի 1-ի քրեական գործը բացահայտված լինելու առթիվ ՀՀ քննչական կոմիտեի ղեկավար, նախկին գլխավոր դատախազ Աղվան Հովսեփյանի հայտարարությունը լուրջ դժգոհություն առաջացրեց հասարակության որոշ շրջանակներում՝ հարուցելով 10 զոհերի հարազատների ցասումը: Երեկ Աղվան Հովսեփյանը որպես Նիգ-Ապարան» հայրենակցական միության նախագահ Ապարանում միջոցառում էր կազմակերպել, որի ընթացքում արտակարգ իրավիճակների նախարար Արմեն Երիցյանի քավորությամբ նոր խաչ ավելացավ Սուրբ խաչ և Հույսի խորան կառույց-հուշարձանին: Խաչի կոթողի մոտ Աղվան Հովսեփյանին հարցրինք, թե արդյոք նման միջոցառումներ կազմակերպելով հնարավո՞ր է հանդարտեցնել հանրության ցասումը կապված մարտի 1-ի առթիվ իր հայտարարության հետ: Պարոն Հովսեփյանն անպատասխան թողեց “Առաջին լրատվականի” հարցը: Ուստի մի քանի հարց ուղղեցինք քննչական կոմիտեի ղեկավարի նոր տեղակալ, ժամանակին Մարտի 1-ի քրեական գործը քննող ՀՔԾ քննչական խմբի ղեկավար Վահագն Հարությունյանին:
– Պարոն Հարությունյան, Աղվան Հովսեփյանի հայտարարությունը՝ Մարտի 1-ի գործը բացահայտված լինելու մասին, հասարակության մեջ բավականին դժգոհություն և ցասում առաջացրեց: Մարտի 1-ի բեռով Դուք ինչպե՞ս եք պատրաստվում աշխատել քննչական կոմիտեում:
– Շատ լավ: Նախ՝ ես այն բեռ չեմ համարում և չեմ գտնում, որ Մարտի 1-ի գործը վատ է քննվել կամ ոչ լիարժեք, և կարծում եմ՝ հետագա նախաքննությունն ով էլ շարունակի՝ պատշաճ կկատարի: Հույս ունեմ նաև, որ կլինեն դրական արդյունքներ:
– Ձեր կատարած գործը ինչպե՞ս եք գնահատում Մատի 1-ի բացահայտման ուղղությամբ, քանի որ Դուք էիք գլխավորում քննչական խումբը:
– Կարծում եմ՝ նորմալ: Ես բազմիցս ասել եմ, որ հսկայական ծավալի մեծ աշխատանք է կատարվել այդ գործով և դեռ կկատարվի:
– Սակայն փաստ է, որ մինչ այժմ այդ սպանությունները կատարողները դեռ չեն բացահայտվել և չեն պատժվել, այսինքն՝ Դուք իրականում ոչ մի բացահայտում չեք արել, և, կարելի է ասել, կոծկվել է այդ գործը:
– Բացահայտում չանելն ու կոծկելը նախ՝ տարբեր բաներ են: Պրակտիկան ցույց է տվել, որ կան գործեր, որոնք բացահայտվում են ուշ, կան գործեր, որոնք բացահայտվում են շատ ուշ՝ սուբյեկտիվ և օբյեկտիվ տարբեր պատճառներով: Ինչ վերաբերում է գործով կատարված նախաքննությանը, ապա կատարվել է լիարժեք, բազմակողմանի և օբյեկտիվ քննություն: Հետագայում էլ կշարունակվի նախաքննությունը եւ, կարծում եմ, արդյունք կլինի:
– Փաստորեն՝ Դուք Ձեզ մեղավոր չեք համարում Մարտի 1-ի գործը կոծկելու համար:
– Կոծկելո՞ւ: Մարտի 1-ի գործը չի կոծկվել:
– Իսկ ի՞նչ է եղել:
– Մարտի 1-ի գործը քննվել է և քննվելու է:
– Կարելի՞ է ասել, որ նույն ոճով եք շարունակելու աշխատել քննչական կոմիտեում, ինչպես ՀՔԾ-ում էիք աշխատում, մասնավորապես մարտի 1-ի գործով:
– Ցտեսություն ձեզ:
