Վանաձոր-Ֆիոլետովո երկաթուղային ճանապարհի շինարարությունն առայժմ տնտեսապես շահավետ չէ. նման եզրահանգման է եկել «Հարավկովկասյան երկաթուղի» ընկերությունը, որի պատվերով կազմվել է նախագծի տեխնիկա-տնտեսական հիմնավորումը: Այսօր լրագրողների հետ հանդիպման ժամանակ ՀԿԵ գլխավոր տնօրեն Վիկտոր Ռեբեցը հայտնեց, որ Վանաձոր-Ֆիոլետովո գծի արժեքը նախնական 250-250 մլն դոլար է գնահատվում՝ կախված լեռնային ռելիեֆից, հողային աշխատանքների, թունելների և կամուրջների կառուցման անհրաժեշտությունից:
Երկաթուղու ուղեգծի բոլոր հնարավոր տարբերակներից ընտրվել են 2-3-ը, որոնցից պետք է վերջանական ընտրել, թե որ ուղիով է անցնելու ճանապարհը: Վ. Ռեբեցի խոսքերով՝ առայժմ հաստատապես չի կարելի կանխատեսել, թե ինչքան կկազմեն փոխադրումների ծավալները, և ինչքան կլինի շահավետությունը:
Վ. Ռեբեցը նշեց, որ հայկական երկաթուղին ՀԿԵ-ին հանձնված է կոնցենսիոն կառավարման, իսկ նոր երկաթգծի կառուցումը բիզնես-նախագիծ է, և այստեղ պետք է կառավարությունն ու մասնավոր հատվածը որոշեն իրենց մասնակցության ձևաչափը: Ամեն դեպքում, երբ գտնվեն ներդրողներ, ըստ Վ. Ռեբեցի, երկաթուղու շինարարությունը կարելի է ավարտել մոտ 2 տարում:
Հիշեցնենք, որ այս երկաթգծի շինաշխատանքների մեկնարկի մասին կառավարությունը բազմիցս հայտարարել է, իսկ այս տարվա սկզբին տրանսպորտի և կապի նախարարը այն անվանել էր «առաջին գերակայություն» և հայտնել, որ այս տարի երկաթգծի կառուցման նախագծային աշխատանքները պետք է ավարտին հասցվեն, ու պետք է սկսվի շինարարությունը: