«Իսլամական պետություն» ահաբեկչական խմբավորման դիրքերին առաջին ավիահարվածները «շատ հաջողակ» են եղել: Այս մասին գրում է RIA Novosti-ն` վկայակոչելով Պենտագոնի ներկայացուցիչ Ջոն Քիրբիին:
«Համաձայն մեր առաջին հաշվետվությունների` այդ հարվածները շատ հաջող էին»,- հայտարարել է Քիրբին:
«Իսլամական պետության» գրոհայինները լքում են Սիրիայի այն շրջանները, որոնց ուղղությամբ երեքշաբթի օրը ԱՄՆ-ի և դաշնակիցների ռազմաօդային ուժերը մի շարք ավիահարվածներ են հասցրել իսլամիստների խմբավորումների դեմ պայքարի շրջանակներում:
Քրդական գերագույն կոմիտեի ներկայացուցիչ Ռեդուր Հելիլը հայտարարել է, որ ջիհադիստները ստիպված են եղել քրդական տարածքներ տեղափոխվել շրջաններից, որոնք հայտնվել են դաշնակից երկրների ավիահարվածների ներքո. «Դա կհանգեցնի մեր զինվորականների վրա ճնշման ուժգնացմանը, եթե դաշնակիցները չռմբակոծեն նաև Քոբանի քաղաքում գտնվող գրոհայինների դիրքերը»: