«Առաջին լրատվական»-ի Realpolitik հաղորդաշարի հյուրն է Հայաստանի ԱԺ Հանրապետական խմբակցության պատգամավոր Արտակ Դավթյանը:
– Ոչիշխանական արդեն եռյակը առաջիկա հոկտեմբերի 10-ին նշանակել է համապետական հանրահավաքը, մինչ այդ նրանք խոստանում են, Հայաստանի տարբեր մարզերում հանդիպել իրենց աջակիցների և համախոհների հետ: Ընդհանուր տպավորություն է, որ իշխանությունները բավական անհանգստացած են՝ սկսած ոստիկանապետի սառը ցնցուղների մասին հայտարարությունից, ընդդիմադիր գործիչների պատասխաններից մինչև իշխանական միջանցքները կարծես խոսվում է, որ համապատասխան մեծ թիվ ապահովելու դեպքում, ընդդիմության գործողությունները կարող են նույնիսկ դուրս գալ հենց իրենց ծրագրած շրջանակներից: Ինչո՞ւ եք անհանգստացած, պարոն Դավթյան:
-Ես չգիտեմ՝ ինչ վերլուծությունների արդյունքում եք հանգել նման եզրակացության:
-Փաստերը՝ սկսած ոստիկանապետի հայտարարությունից։
– Դուք արդեն նշեցիք՝ ոստիկանապետի հայտարարություն կամ այլ մեկնաբանություններ. բնական է, մենք ձեզ հետ միասին խոսում ենք այդ թեմայի շուրջ, Դուք հարց եք տալիս, ես էլ պատասխանում եմ: Նմանատիպ հարցադրումներ եղել են նաև ոստիկանապետին, և ոստիկանապետն էլ, կարծում եմ, շատ հակիրճ պատասխանել է, և նրա պատասխանը եղել է, որ եթե օրենքի շրջանակից դուրս գան, որովհետև հիմնականում օգտագործում է նաև այնպիսի ածականներ ու հասկացողություններ, ինչպիսիք են՝ «թեժ աշուն», «շոգ» կամ «կրակե», ամենատարբեր գնահատականներ են տալիս: Ոստիկանապետն էլ, կարծում եմ, իր ոճի մեջ բավական կոլորիտային պատասխան է տվել:
Այսինքն՝ եթե լինեն այնպիսի զարգացումներ, որ օրենքի շրջանակներից դուրս գան, դա ոստիկանության սուրբ պարտականությունն է, ինչպես նաև նրա սուրբ պարտականությունն է, որպեսզի այդպիսի միջոցառումների ժամանակ հասարակական կարգ ու կանոնը պահպանվի, ինչը ևս, մինչև այժմ գիտենք, ոստիկանությունը իր դերակատարումը բավական հաջող կատարում է:
Դա, համենայնդեպս, նրանց գործն է՝ հանդիպել, գաղափարներ, ծրագրեր կիսել, ասել: Թող կիսեն, ասեն, եթե այդ ամենը օգտակար է իրենց, և ավելին ասեմ՝ ժողովրդի համար, որ ժողովրդի մի ստվար զանգվածի հարցերին կարողանան պատասխաններ գտնել ու տալ. որևէ վատ բան դրանում տեսնել պետք չէ: Իսկ մենք նրանց գործողություններին բավական հանգիստ ենք վերաբերվում, այնպես, ինչպես էլ հենց պետք լինի: Իրենց որոշելիք և իրենց անելիքներն են, իսկ թե ինչպիսին կլինի՝ ժամանակը ցույց կտա, և ի՞նչ բազմություն կհավաքեն, ի՞նչ օրակարգ կձևավորեն, ինչի՞ մասին կխոսեն՝ կտեսնենք. հոկտեմբերի 10-ը այնքան էլ հեռու չէ:
– Ձեր կուսակցության մամլո խոսնակն ասում էր, թե միակ անհանգստությունը, որ ունեք, ռևանշիզմի և օլիգարխիայի սերտաճումն է: Ունե՞ք այդպիսի անհանգստություն իսկապես՝ նկատի ունենալով ոչիշխանական ՀԱԿ-ին և ԲՀԿ-ին, պարոն Դավթյան, երբ սկսել է, փաստորեն, իշխանությունը իրերն իրենց անուններով կոչել:
– Նորից պիտի նշեմ՝ դա ՀԱԿ-ի և ԲՀԿ-ի որոշելիք հարցերն են, թե ինչ անեն: Մի բան ակնհայտ է, որ ՀԱԿ-ի մեր գործընկերները, քննադատելով Հանրապետականին, իրենք իսկ գովաբանում են մի բան, որը ակնհայտ է կոնկրետ այս պարագայում: Եթե քննադատում են Հանրապետականին, այն բանի համար, որ նրա շարքերում կան գործարարներ, կարծես թե իրենց գործընկեր կուսակցության պարագայում չեն ուզում տեսնել:
Մի կողմ եմ թողնում դրա բովանդակային էությունը՝ ինչքանով են նրանք ճիշտ կամ սխալ, բայց դա այնքան ակնհայտ է, որ նման բեռով հանդես գալ, բացատրել, թե՝ գիտեք, իրենք գաղափարի կրողներ են, և այդ գաղափարները արժեքային որոշակի համակարգում են ձևավորվում՝ այստեղ է, որ չեմ հավատում: Չեմ հավատում, որովհետև կարիք էլ չկա անդրադառնալու այն փառապանծ տարիներին՝ չակերտավոր, երբ կոնկրետ ՀԱԿ-ականները իշխանության լիարժեք կրողներն էին, և իրենք իրենց գործերով կարծես թե այն աժեքների, որ հիմա քարոզում են, կրողները գոնե չեն եղել մեծ հաշվով, բայց դրա մասին շատ է խոսվել:
Անցել են տարիներ, նաև տասնամյակներ, և մենք տեսնում ենք, որ ոչինչ էլ չի փոխվել: Եվ այս առումով ես կիսում եմ իմ գործընկերոջ արտահայտած այդ տեսակետը:
-Պարոն Դավթյան, ընդհանուր տպավորություն կա, որ 2008 թ. ընդդիմադիր շարժումը, որը իսկապես աննախադեպ էր Հայաստանի նորանկախ պատմության մեջ, շատ ավելի մեծ սպառնալիք էր իշխանության համար, քան այն, ինչ այսօր ձևավորվում է քաղաքական դաշտում, և որպես փաստարկ բերվում է այն, որ Գագիկ Ծառուկյանն իր ունեցած կարողություններով կամ ԲՀԿ-ի տարբեր գործարար պատգամավորներ, իրենց ունեցած գործերով, բիզնեսներով և այլն, ավելի կառավարելի և ավելի վերահսկելի են իշխանության համար, ընդհուպ խոսվում է, որ ընդդիմադիր դաշտ իրականում Ծառուկյանին և իր թիմին գործուղել է իշխանությունը, որպեսզի ընդդիմադիր այն զանգվածը, որը, այսպես կամ այնպես, պետք է ուղղորդվեր այս կամ այն քաղաքական ուժի տրամադրության տակ, այն ևս հնարավորինս վերահսկելի և իշխանության կամային դաշտում և տիրույթում շարունակի գտնվել:
– Կարծում եմ, որ կա այդ հարցի պատասխանը. բազմիցս հենց իրենք՝ ԲՀԿ-ի առաջին դեմքերն են այդ հարցի պատասխանը տվել, և նրանք ուղղակի շատ լակոնիկ են, ու միանգամից ժխտողական պատասխան է տրվում, և սա բնական է: Բնական է, որովհետև ԲՀԿ-ն տարբեր անձանցից է ներկայացված, և գուցե այս կամ այն անձի այս կամ այն գործունեությունը կամ արտահայտությունը զուտ հասարակական ընկալումների մեջ նաև որոշակի նմանատիպ եզրահանգումների բերի, բայց կարծում եմ, որ նրանք պատասխանել են և իրենց պատասխաններով կարծես թե փակել են այդ հարցը:
Հարցազրույցն ամբողջությամբ՝ տեսանյութում
