Վերահսկիչ պալատի նախագահ Իշխան Զաքարյանն այս շաբաթ Ազգային ժողովի մշտական հանձնաժողովներում ներկայացնում է 2013թ. հաշվետվությունը: Այսօր նա հաշվետվության՝ առողջապահության ոլորտին վերաբերող հատվածը ներկայացնում էր Առողջապահության, մայրության և մանկության հարցերի մշտական հանձնաժողովում:
Նշենք, որ հատկապես այս ոլորտում ՎՊ-ն հայտնաբերել էր բավականին աղմկոտ դեպքեր: Օրինակ, ըստ ՎՊ հաշվետվության, Առողջապահության նախարարությունը 2012թ. և 2013թ. առաջին կիսամյակում «Նատալի ֆարմ» և «ՄԼՆ ֆարմ» ընկերություններից մրցութային կարգով ձեռք է բերել ավելի քան 224 հազար սրվակ ինսուլին՝ 1 սրվակը 4800 դրամ արժողությամբ: Հետագայում՝ 2013-2014թթ. Համար, բանակցությունների միջոցով պայմանավորվածություն է ձեռք բերվել ինսուլինը ձեռք բերել «Նովո-Նորդիսկ Ա/Կ» ընկերությունից գրեթե եռակի ցածր գնով՝ 1 սրվակը 1345 դրամ արժողությամբ: Եվ այդ գործարքի արդյունքում 2014թ. միայն ինսուլինի գնման դեպքում տեղի է ունենում 736 մլն դրամ պետական միջոցների խնայում:
Արդյոք այս հանգամանքը չի՞ նշանակում, որ տարիներ շարունակ եռակի թանկ ինսուլին գնելով՝ Առողջապահության նախարարությունը միտումնավոր վատնել կամ փոշիացրել է պետական միջոցները: Կամ արդյոք այդ գնումներում կոռուպցիոն մեծ ռիսկե՞ր չկան:
«Առաջին լրատվական»-ի հետ զրույցում Ի.Զաքարյանը հրաժարվեց գնահատական տալ նման երևույթներին՝ ասելով, թե ինքն ու իր ղեկավարած կառույցը չպետք է մտնեն այդ դաշտը, և որ իրենք ընդամենը փաստերն են հրապարակում:
Հայտնի է, «Նատալի ֆարմ» ընկերությունը պատկանում է ԱԺ Հանրապետական խմբակցության գործարար պատգամավոր Սամվել Ալեքսանյանին: Այսինքն՝ Ս.Ալեքսանյանը տարիներ շարունակ միայն ինսուլինի բիզնեսից պետական բյուջեից տարեկան մոտ 700 մլն դրամ շահույթ է ստացել: Իսկ Ս.Ալեքսանյանն այսօր հիմնական դեղ ներկրողն ու իրացնողն է: Արդյոք սա չի՞ նշանակում, որ բոլորովին էլ պատահական չէ, որ հենց Ս.Ալեքսանյանին պատկանող ընկերությունն է Առողջապահության նախարարության հիմնական դեղ մատակարարողը, և որ այդ ճանապարհով պետբյուջեի միջոցները հոսում են նրա գրպանը: Ի.Զաքարյանը հրաժարվեց պատասխանել նաև այս հարցին՝ ասելով, թե իրենց գործառույթի մեջ չի մտնում բացահայտելը, թե որ ընկերությունը ում է պատկանում:
ՎՊ նախագահը նաև հավելեց, որ պետական միջոցներով դեղերի գնումների ոլորտը 2014 և 2015 թթ. նույնպես իրենց ուշադրության կենտրոնում է, և որ ինսուլինից բացի՝ վերահսկելու են շաքարային դիաբետի համար անհրաժեշտ այլ դեղորայքների, ինչպես նաև հակաբորբոքային ու հոգեմետ դեղերի գնումների ոլորտը: Ի.Զաքարյանը հավելեց նաև, որ Գերմանիայի իրենց գործընկերոջ հետ ունեն պայմանավորվածություն, որ որոշ դեղատեսակներ ուղարկեն այնտեղ փորձաքննության՝ պարզելու համար, թե արդյոք դրանք համապատասխանո՞ւմ են իրենց տեխնիկական պահանջներին:
Ի.Զաքարյանը, սակայն, հրաժարվեց պատասխանել մեր այն հարցին, թե 2013թ. բյուջեի որքա՞ն մասն է գտնվում կոռուպցիոն ռիսկի գոտում: Անցած տարի, հիշեցնենք, նա բավականին աղմկոտ հայտարարություն արեց, թե պետական բյուջեի 70 տոկոսը գտնվում է կոռուպցիոն ռիսկի տակ: Այս և մի քանի այլ աղմկոտ հայտարարությունների պատճառով նա սուր քննադատության ենթարկվեց թե՛ Սերժ Սարգսյանի, թե՛ ՀՀԿ-ական պատգամավորների ու նախարարների կողմից: Հավանաբար այդ պատճառով էլ ՎՊ նախագահն այժմ զգուշանում է գնահատականներ հնչեցնելուց և սուր հայտարարություններ անելուց:
