Քիչ առաջ ավարտվեց ոչ իշխանական եռյակի հերթական հանդիպումը, որն այս անգամ տեղի ունեցավ առանց Դաշնակցություն խմբակցության մասնակցության:
Հիշեցնենք. ՀՅԴ-ն անցած շաբաթ որոշել էր չմասնակցել հոկտեմբերի 10-ին նախատեսված հանրահավաքին, քանի որ քառյակի մյուս ուժերը՝ ՀԱԿ, «Բարգավաճ Հայաստան» և «Ժառանգություն» կուսակցությունները որոշել էին, որ այդ միջոցառման ժամանակ պետք է քննադատեն իշխանությունների նախաձեռնած սահմանադրական փոփոխությունները: ՀՅԴ-ն կողմ է այդ փոփոխություններին, քանի որ դրանցով իշխանությունները նախատեսում են Հայաստանում ներդնել խորհրդարանական կառավարման համակարգ: Իսկ քառյակի այս ուժերը գտնում են, որ այդ փոփոխություններով իշխանությունները ցանկանում են վերարտադրվել:
Եռյակի այս նիստը տեղի ունեցավ «Ժառանգություն» խմբակցությունում: Նիստի ավարտից հետո խմբակցութան ղեկավար Ռուբիկ Հակոբյանը լրագրողների հետ հանդիպման ժամանակ տեղեկացրեց, որ քննարկել են չորս հարցեր:
Նախ՝ որոշել են մարզային այցելությունների հերթականությունն ու ժամանակացույցը և նախատեսել սեպտեմբերի 25-ից մինչև հոկտեմբերի 8-ը անցկացնել 10 փոքր հանրահավաքներ կամ հանդիպումներ: Իսկ առաջին այցը տեղի կունենա սեպտեմբերի 25-ին՝ Աբովյան քաղաքում, երկրորդը սեպտեմբերի 26-ին՝ Հրազդանում, այնուհետև 28-ին՝ Սիսիանում և Կապանում, հոկտեմբերի 3-ին՝ Արարատում, հոկտեմբերի 4-ին՝ Իջևանում, հոկտեմբերի 6-ին՝ Վանաձորում և հոկտեմբերի 8-ին՝ Գյումրիում:
Քննարկել են այն գնահատականները, որ պետք է հնչեցնեն հանրահավաքի ժամանակ իշխանություններին ներկայացրած իրենց 12+1 պահանջների կատարման ընթացքի վերաբերյալ: Սկսել են ձևավորել հոկտեմբերի 10-ի հանրահավաքի օրակարգն ու դրա հետ կապված տեխնիկական հարցեր:
Ռ. Հակոբյանն այլ մանրամասներ չնշեց: Լրագրողների հարցերին՝ հոկտեմբերի 10-ին ի՞նչ պահանջեր են հնչելու, կամ կհնչի՞ Սերժ Սարգսյանի հրաժարականի և ամբողջական իշխանափոխության պահանջ, Ռ. Հակոբյանը պատասխանեց, թե նման հարցերը որոշելու են մարզային հանդիպումներից հետո ժողովրդից ստացած ազդակների արդյունքում: Նա նույն պատասխանը տվեց նաև այն հարցին, թե հոկտեմբերի 10-ից հետո կլինե՞ն շուրջօրյա հանրահավաքներ: Նա նաև հավելեց, թե առաջիկայում կքննարկվի հանրահավաքին եռյակի լիդերների մասնակցության հարցը:
Ռ. Հակոբյանը չհամաձայնեց լրագրողների այն դիտարկումների հետ, որ ՀՅԴ-ն դուրս է եկել քառյակից, կամ որ քառյակն այլևս միասնական չէ: Նա չցանկացավ անդրադառնալ ՀՅԴ-ից քառյակի նկատմամբ հնչող քննադատություններին: Մասնավորապես, ՀՅԴ Բյուրոյի ներկայացուցիչ Հրանտ Մարգարյանը հեռուստաընկերություններից մեկին տված իր հարցազրույցում հայտարարել էր, թե եռյակի ուժերը վախենում են, որ իշխանությունները կընդունեն սահմանադրական փոփոխությունների իրենց փաթեթը, և լավ բան կլինի: Նա նաև հայտարարել էր՝ եռյակի ուժերը վարչապետի հրաժարականը չեն պահանջի, փոխարենը թիրախ են ընտրել սահմանադրական փոփոխությունները և այլն: Ռ. Հակոբյանն ընդամենը կոռեկտ չհամարեց ՀՅԴ-ից եռյակի նկատմամբ և եռյակից ՀՅԴ-ի նկատմամբ հնչող սուր քննադատությունները: