Աջափնյակ և Դավթաշեն վարչական շրջանների ընդհանուր իրավասության դատարանում Մարինե Մելքոնյանի նախագահությամբ ավարտվեց Արթուր Մ.-ի գործի դատական քննությունը:
Ըստ մեղադրանքի՝ 26-ամյա Արթուրը 2012 թվականի հունիսին ստեղծել է «18plus.am» ինտերնետային կայքը և պոռնկագրական բնույթի նյութեր տարածելու դիտավորությամբ այդ կայքի «18+ խաղեր» բաժնում 2013 թվականի փետրվարի 17-ից մինչև 2014 թվականի հունվարի 31-ը տեղադրել է պոռնկագրական բնույթի պատկերներ և անիմացիոն խաղեր, որոնք ազատ հասանելի են եղել համացանցի բոլոր օգտատերերին:
Արթուրը բարձրագույն կրթություն ունի. ավարտել է ԵՊՀ-ն, տեղեկատվական տեխնոլոգիաների մասնագետ է:
Ամբաստանյալի միջնորդությամբ դատական քննությունը կատարվեց արագացված ընթացակարգով, այսինքն՝ Արթուր Մ.-ն իրեն մեղավոր ճանաչեց ու զղջաց կատարածի համար:
Այսօր դատարանն ունկնդրեց կողմերի վիճաբանությունները:
Մեղադրող Միքայել Գրիգորյանը միջնորդեց մեղավոր ճանաչել ամբաստանյալին ու դատապարտել 300 հազար դրամ տուգանքի:
Ամբաստանյալի շահերի պաշտպան Գիվի Հովհաննիսյանը մեկ անգամ ևս հիշատակեց Արթուրի անձը բնութագրող փաստաթղթերը՝ դրական բնութագրեր բնակության և պարտադիր զինծառայության վայրերից, հավաստագրեր՝ համակարգչային հատուկ դասընթացներ անցնելու վերաբերյալ, դիպլոմներ՝ երրորդ տեղ գրավելու մասին. Արթուրը զբաղվում է պաուերլիֆտինգով:
Փաստաբանը, որպես իր պաշտպանյալի պատասխանատվությունն ու պատիժը մեղմացնող հանգամանքներ նշեց նախկինում դատված չլինելը, մեղքն ընդունելն ու արարքի համար անկեղծորեն զղջալը: Այս հանգամանքներում, ըստ պաշտպանի, Արթուրի նկատմամբ դատարանը կարող է նշանակել հոդվածի տվյալ մասով նախատեսված նվազագույն պատիժ՝ 200 հազար դրամ տուգանք:
Արթուրը վերջին խոսքում խնդրեց իր նկատմամբ մեղմ պատիժ նշանակել:
Դատարանը հեռացավ խորհրդակցական սենյակ:
Պաշտպանը Արթուրին մեղսագրված արարքի վերաբերյալ մեր զրույցում ասաց, թե օրենքով լավ հստակեցված չէ, թե ինչ ասել է «պոռնկագրական նյութերի տարածում»: Այն նյութերը, որ «18+» կայք է գցել Արթուրը, արդեն իսկ եղել են համացանցում: Արթուրը համացանցի մի հասցեից վերցրել ու տեղադրել է նաև այլ հասցեում՝ մտածելով, որ եթե նյութերը համացանցում են, ուրեմն թույլատրելի են: Հասարակ քաղաքացու համար անհնար է տարբերակել՝ նյութերը պոռնկագրակա՞ն բնույթի են, թե՞ ոչ: Անգամ նախաքննական ու դատաքննական մարմինները դա չեն որոշում, այդ հարցին պատասխան են տալիս միայն փորձագետները: Ստացվում է, որ այստեղ ծուղակ կա հասարակ քաղաքացիների համար: Նյութերի՝ համացանցում գտնվելը կարող է տպավորություն ստեղծել, թե դրանք քրեական առումով «անմեղ» նյութեր են, մինչդեռ իրականում դրանց տեղադրումը որևէ կայքում կարող է հանգեցնել քրեական պատասխանատվության:
Մնում է, որ օգտատերերը, հատկապես երիտասարդները, զգույշ լինեն, ձեռնպահ մնան նման նյութերը համացանցային կայքերով կամ այլ միջոցներով տարածելուց:
Նախագահողը քիչ անց հրապարակեց դատավճիռը:
Արթուր Մ.-ն մեղավոր ճանաչվեց ՀՀ քրեական օրենսգրքի 263 հոդվածի 1-ին մասով և դատապարտվեց 300 հազար դրամ տուգանքի:
Ամբաստանյալն ասաց, որ չի բողոքարկելու դատավճիռը: