Տնտեսական աճի տեմպերը դանդաղում են հատկապես արդյունաբերության մեջ, ներդրումների ծավալը ևս գոհացուցիչ չէ: Լրագրողների հետ հանդիպման ընթացքում այս մասին ասաց ԲՀԿ խմբակցության պատգամավոր, տնտեսագետ Միքայել Մելքումյանը՝ հավելելով, որ կառավարությունը փորձում է աշխատանքներ տանել նաև օրինագծերի տեսքով, բայց դեռ տեսանելի արդյունքներ չկան: «Այսօրվա կառավարությունը դեռ չի գտել այն կոնցեպտը, ռեցեպտը, որով ներդրողներ կբերեն: Պիտի ներդրողի ականջին հասցնենք, որ Հայաստանում ներդրումները կատարելը անվտանգ է»,- ասաց նա:
Ըստ Մելքումյանի՝ պիտի ազատագրվել նաև մենաշնորհից, և իրավիճակը շտկելու համար քաղաքական կամք է պետք: Պատգամավորի համար զավեշտալի են այն պնդումները, թե Սահմանադրությունը չի պարտադրում կառավարությանը սոցիալական բարեփոխումներ անել, ուստի սահմանադրական բերեփոխումներով այդ խնդիրը կլուծվի: Ըստ նրա՝ բարեփոխումները ոչ թե Սահմանադրությամբ, այլ օրենքներով և դրանք հարգելով են երաշխավորվում:
Պատասխանելով «Առաջին լրատվական»-ի այն հարցին, թե Հայաստանում ինչպիսի տնտեսական իրավիճակ կլինի Եվրասիական միությանը անդամակցությունից հետո, Մ.Մելքումյանն ասաց. «Երեք հիմնադիր երկրների համար միությունը զուտ քաղաքական նշանակություն ունի, իսկ մեզ համար՝ 170 միլիոնանոց շուկայից ակնկալիքներ ունենք, բայց մենք սա ավելի շատ անվտանգության ռեժիմի ձևաչափում ենք ընդունել»:
Տնտեսագետը անդրադարձավ նաև Ռուսաստանի դեմ պատժամիջոցների խնդրին և Հայաստանի վրա դրանց հնարավոր ազդեցությանը: Ըստ նրա՝ դրանք իրավական ազդեցություն չեն ունենա, բայց տրասֆերտները կնվազեն: Բացի դրանից, պատժամիջոցների շարունակական լինելու պարագայում, պատժամիջոցները կազդեն նաև բանկային, Էներգետիկ համակարգի վրա:
Մ.Մելքումյանը անդրադարձավ նաև ոչիշխանական ուժերի հանրահավաքին՝ նշելով, որ ամենատարբեր հարցեր են քննարկվելու՝ Սահմանադրությունից միչև փոքր և միջին բիզնեսի խնդիրները: Ըստ նրա՝ հանրահավաքի ուժը կերևա հենց հանրահավաքի օրը: Ինչ վերաբերում է իշխանությունների կողմից քառյակի 12 պահանջենրի իրականացմանը, պատգամավորը հորդորեց չշտապել: «12 կետերից շատ քիչ բան է արված, բայց չշտապենք, ժամանակը գա-լրանա, տեսնենք»,- եզրափակեց նա: