«Ժողովուրդ» թերթը գրում է. «Երեկ Ծովակ համայնքի մի խումբ բնակիչներ փակել էին իրենց գյուղից դեպի Վարդենիս քաղաք մտնող ավտոճանապարհը: Պատճառը երկու օր առաջ վարդենիսցիների կողմից Ծովակի երկու բնակիչների` հայր և որդու դաժան ծեծի ենթարկելու դեպքն էր:
Ոստիկանության հասարակայնության հետ կապերի և լրատվության վարչությունից armlur.am-ին հայտնել էին, որ սեպտեմբերի 20-ին Վարդենիս-Երևան ավտոճանապարհին 1995թ. ծնված Մանուկը, վարելով BMW մակնիշի ավտոմեքենան հանդիպել է դիմացից երթևեկող ՎԱԶ 21/150 մակնիշի մեքենային: Վարորդները ճանապարհը չեն զիջել միմյանց: Արդյունքում Հրավարդ Սարգսյանը (Գագիկ) և նրա որդին՝ Մանուկ Սարգսյանը, մյուս մեքենայի երկու անծանոթների հետ վեճի են բռնվել, որի ժամանակ էլ անծանոթները ծեծել են Մանուկին և նրա հորը՝ գանգուղեղային տրավմայի ենթարկելով Գագիկին:
Ավելի ուշ հայտնի դարձավ, որ Վարդենիս քաղաքի բնակիչներ՝ 38-ամյա Մարտին Հակոբյանը, 27-ամյա Զոհրաբ Կարապետյանն ու 27-ամյա Հրանտ Շաբոյանն են եղել Ծովակի բնակիչներին ծեծողները: Ավելին՝ տղաներն իրենց վայրագությունն անելուց հետո փակել են տան դռներն ու փախուստի դիմել: Եվ հենց այս փաստն էլ խիստ զայրացրել էր Ծովակի բնակիչներին, ովքեր արդարության և հանցագործներին շտապ գտնելու պահանջով փակել էին Վարդենիս մտնող ճանապարհը:
Մանրամասները՝ թերթի այսօրվա համարում
