Սեպտեմբերի 20-ին կինեմատոգրաֆիայի լեգենդ Սոֆի Լորենը դարձավ 80 տարեկան: Սակայն տարիքը ոչ մի կերպ չի ազդում դերասանուհու կերպարի վրա, ով տիրացել է սեքս-խորհրդանիշի տիտղոսին: Զարմացնում է նրա կենսական ուժը, մտքի կենսունակությունը, կեցվածքն ու գեղեցկությունը: Լորենը կարծես կանգնել է մի որոշակի տարիքի վրա և ոչ մի կերպ չի ծերանում՝ գրում է econet.ua-ը:
Կարիերայի ամենասկզբում Սոֆի Լորենին խորհուրդ էին տվել պլաստիկ վիրաբուժության միջոցով ուղղել քիթը և նիհարել: Սակայն նա հրաժարվել է՝ ասելով, որ չի ցանկանում համապատասխանել ոչ բնական գեղեցկության չափանիշներին: Այն մասին, թե ինչպես է նրան հաջողվում գեղեցիկ մնալ, դերասանուհին պատմել է իր «Կինը և գեղեցկությունը» գրքում:
1. Ինքնակարգապահություն
«Եթե երիտասարդ կինը գեղեցիկ է, սակայն սովոր չէ կարգապահորեն հետևել իրեն, ապա ժամանակի հետ կորցնում է իր գեցեկությունը: Իսկ եթե ամենասովորական կինը կարգապահորեն հետևում է իրեն, ապա տարիքի հետ միայն ավելի է գեղեցկանում»,- գրում է Սոֆին:
2. Ճիշտ սնունդ
Լորենի խոսքերով՝ նա դիետաներ չի պահում և սիրում է ուտել: Սակայն դա ճիշտ է անում: Հարկավոր է միշտ ուտել փոքր չափաբաժիններով և հետևել սննդին: «Այն բանից, թե ինչ ես ուտում, կախված է ոչ միայն կազմվածքդ, այլև դեմքդ, ինքնազգացողությունդ ու տրամադրությունդ»: Դերասանուհին օգտագործում է պարզ մթերքներ, խուսափում է օսլայից, պահածոյացված մթերքներից, քիչ է օգտագործում կարմիր միս, փոխարենը՝ ավելի շատ ձկան և հավի միս: Եվ ամենակարևորը՝ Սոֆիի կարծիքով, հարկավոր է շատ հեղուկներ օգտագործել:
3. Ֆիզիկական ծանրաբեռնվածություն
Իր կյանքի ընթացքում Սոֆի Լորենին հաջողվել է գեղեցիկ իրանն ու բարակ գոտկատեղը պահպանել: Եվ դա ոչ միայն ճիշտ սննդի, այլև ֆիզիկական վարժությունների շնորհիվ:
Դերասանուհին ասում է, որ «ֆիզիկական վարժությունները զարգացնում են կեցվածքը: Եթե դուք մարմնամարզությամբ եք զբաղվում, ապա այնպես եք քայլում, կարծես ամբողջ աշխարհը ձեզ է պատկանում՝ հպարտ և սահուն»:
4. Մերձավորների սերը
Չնայած երկրպագուների հսկայական բանակին՝ Սոֆին իր ամբողջ կյանքում միայն մեկ մարդու է սիրել՝ ամուսնուն՝ ռեժիսոր Կառլո Պոնտիին: Նրանք միասին գրեթե 50 տարի են ապրել: Պոնտին մահացել է 2007թ.: Նրանք երկու երեխաներ ունեն, որոնց հետ դերասանուհին փորձում է շատ ժամանակ անցկացնել:
5. Լավատես լինել
Սոֆի Լորենն ասում է, որ դեմքը հոգու հայելին է և արտացոլում է մարդու բնավորությունը: Դերասանուհին խոստովանում է, որ զբոսանքի ժամանակ անընդհատ մտածում է, որ այնտեղ՝ անկյունում, անպայման մի գեղեցիկ բան կգտնի: «Վայելեք կյանքը, յուրաքանչյուր պահը: Միշտ ձեզ այնպիսի մարդկանցով շրջապատեք, ում սիրում եք, ում հետ հաճելի է խոսել և նոր բան իմանալ»:
6. Ինքնաճանաչում և տարիքի ընդունում
«Տարիքը սկսվում և ավարտվում է խելքով,- ասում է Լորենը:- Աշխարհում ոչ մի գեղեցկություն չի կարող համեմատվել ինքնաճանաչման և բավարարվածության զգացման հետ, որը գալիս է այն ժամանակ, երբ ինքդ քեզ ընդունում ես այնպիսին, ինչպիսին կաս իրականում»: Դերասանուհու սկզբունքն է. «Թող կյանքն ընթանա այնպես, ինչպես ընթանում է»:
