ԱՄՆ-ը հուսով է, որ սիրիական չափավոր ընդդիմությանը ուսուցանելը կօգնի պայքարել ոչ միայն «Իսլամական պետության» գրոհայինների, այլև Սիրիայի կառավարական զորքերի դեմ՝ հաղորդում է NBC-ն: Այս մասին հայտարարել է ՄԱԿ-ում ԱՄՆ մշտական ներկայացուցիչ Սամանտա Փաուերը:
Նրա խոսքերով՝ ապստամբները գիտեն, որ ԱՄՆ-ը նրանց կզինի և կմարզի «Իսլամական պետության» դեմ պայքարելու համար: «Սակայն այդ պատրաստվածությունը նրանց կօգնի պայքարել նաև Բաշար Ասադի ռեժիմի դեմ»,- ասել է Փաուերը:
Անցած ուրաբթ ԱՄՆ նախագահ Բարաք Օբաման ստորագրել է օրենք, որը Միացյալ Նահանգներին թույլ կտա զինել և մարզել սիրիական չափավոր ընդդիմությանը, մասնավորապես՝ «Սիրիական ազատ բանակին»՝ «Իսլամական պետության» գրոհայինների դեմ պայքարելու համար: Օրենքը չի նախատեսում «Իսլամական պետության» գրոհայինների դեմ պայքարելու համար ուղարկել ամերիկյան զինված ուժերի ստորաբաժանումներ:
Փաուերը հիշեցրել է, որ «Իսլամական պետության» դեմ արշավին պատրաստ են աջակցել 40 պետություններ: Սակայն նա հրաժարվել է հստակեցնել, թե որ երկրներն են դրանք և կոնկրետ ինչ օգնություն են պատրաստ ցուցաբերել: