«Ես լավատես եմ և բոլորին եմ ուզում ցանկանալ այդ լավատեսությունը: Ես համարում եմ, որ տարեցտարի Հայաստանը պլյուս նշանաբանով առաջ է գնում, իհարկե թերություններով, իհարկե սխալներով: Այ եթե հիշենք, թե ինչու ենք մենք կորցրել պետականությունը, այ երևի քննադատության դոզան լինի մի քիչ ցածր, մի քիչ բարյացակամ»,- «Առաջին լրատվական»-ի հետ զրույցում, խոսելով Անկախության 23-րդ տարեդարձից, նշեց Վրաստանի նախկին նախագահ Միխեիլ Սաակաշվիլիի խորհրդական Վան Բայբուրդը:
Նրա խոսքով՝ Հայաստանը զարգանում է: «Ես ապրում եմ հարևան Վրաստանում և տեսնում եմ, որ Հայաստանի դրությունը դեպի լավն է գնում»,- ասաց նա:
Վան Բայբուրդը նշեց, որ ամբողջովին անկախ փոքր պետություն աշխարհում գոյություն չունի: Նույնիսկ 40-50 մլն բնակչությամբ երկրները լրիվ անկախություն չունեն: Անկախություն ասվածը հարաբերական բան է փոքր երկրի համար:
