Հայաստանի արտգործնախարար Էդվարդ Նալբանդյանն այսօր ընդունել է Լեհաստանի Սենատի անդամ, Հայաստանի հետ խորհրդարանական բարեկամության խմբի նախագահ Լուկաշ Աբգարովիչին, ով Հայաստան է ժամանել Հայաստան-Սփյուռք Հինգերորդ Համաժողովին մասնակցելու նպատակով։
Նախարար Նալբանդյանը ողջունել է սենատոր Աբգարովիչի այցելությունը Հայաստան և Արցախ՝ ընգծելով, որ նման այցելությունները հնարավորություն են ընձեռում` առաջին ձեռքից տեղեկանալու և օբյեկտիվ պատկերացում կազմելու տարածաշրջանային գործընթացների մասին։
Շնորհակալություն հայտնելով ընդունելության համար սենատոր Աբգարովիչը վստահեցրել է, որ շարունակելու է իր գործունեությունն՝ ուղղված Հայաստանի հետ հարաբերությունների ամրապնդմանը։ Լեհ սենատորը արտգործնախարարին ներկայացրել է Արցախ կատարած իր այցելության տպավորությունները։
Զրույցի ընթացքում քննարկվել են հայ-լեհական համագործակցության զարգացման ուղիները, կարևորվել է միջխորհրդարանական կապերի դերը և ընդգծվել դրանց աշխուժացման անհրաժեշտությունը:
Հանդիպմանն անդրադարձ է արվել հայ-լեհական տնտեսական հարաբերությունների առավել ընդլայնման ուղղությամբ իրականացվող աշխատանքներին: Այդ առումով կարևորվել է հայ-լեհական միջկառավարական հանձնաժողովի գործունությունը, որի հերթական նիստը նախատեսվում է անցկացնել Վարշավայում ընթացիկ տարվա ավարտին:
Նախարար Նալբանդյանն ու սենատոր Աբգարովիչը մտքեր են փոխանակել մշակութային շփումների ակտիվացման, ապակենտրոնացված համագործակցության ընդլայնման շուրջ։
Էդվարդ Նալբանդյանը հյուրին ներկայացրել է տարածաշրջանային հիմնախնդիրների և դրանց լուծման ուղիների վերաբերյալ Հայաստանի մոտեցումները։