ՀՀ ԿԳՆ-ն և ԱՅԲ կրթական հիմնադրամը, համագործակցելով Քեմբրիջի համալսարանի և Լոնդոնի կրթության ինստիտուտի հետ, սկսում են «Կրթության գերազանցության ազգային ծրագիր» մեծամասշտաբ կրթական նախաձեռնություն, որը նպատակ ունի կարևորել ուսուցչի դերը հասարակության մեջ, գրավիչ դարձնել կրթության սպասավորի մասնագիտությունը: Նախատեսվում է, որ Հայաստանում մեկ տասնամյակի ընթացքում Կրթության գերազանցության ազգային ծրագիրը կհավաստագրի 2000 միջազգային որակավորման ուսուցիչների: Այս մասին այսօր ասուլիսին տեղեկացրեց ԿԳ նախարար Արմեն Աշոտյանը:
Արմեն Աշոտյանի խոսքով՝ ուսուցիչների վերապատրաստումը տեղի է ունենալու Հայաստանում: Նախարարը նշեց, որ նոր ծրագրով, նոր կրթական բովանդակությամբ աշխատող դպրոցների ցանկը որոշելու է ՀՀ կառավարությունը: Ծրագրի առաջին փուլում, որը տևելու է երեքից հինգ տարի, ընդգրկվելու են տասներկու ավագ դպրոցներ, մեկական՝ ամեն մարզում և երկու ավագ դպրոց՝ մայրաքաղաքում: Ծրագրի շրջանակում ուսուցիչների վերապատրաստման համար առավելություններ և արտոնություններ կստանան հենց այդ դպրոցներում աշխատող ուսուցիչները:
Նախարարի խոսքով՝ այս ծրագիրն ամբողջությամբ համընկնում է մեր ծրագրերի հետ: «Այս ծրագրին զուգահեռ՝ Համաշխարհային բանկի հետ նոր վարկային ծրագիր ենք մեկնարկում, որը հնարավորություն կտա ամբողջությամբ վերանորոգել և վերազինել հանրապետության 17-20 ավագ դպրոցներ: Մենք նոր կրթական միջավայրում կունենանք նոր կրթական ծրագիր»,- նշեց նախարարը:
Այն ուսուցիչները, ովքեր կապացուցեն իրենց մասնագիտական ունակությունները, կանցնեն վերապատրաստման բավականին բարդ և ժամանակակից ծրագրով, հնարավորություն կստանան աշխատելու այդ դպրոցներում և վաստակելու առավել բարձր աշխատավարձ՝ 400.000 դրամին համարժեք:
ԱՅԲ հիմնադրամի հոգաբարձուների խորհրդի նախագահ Տեր Մեսրոպ քահանա Արամյանն էլ նշեց, որ սկսվում է երկարատև մի ծրագիր, որի նպատակն է Հայաստանում ունենալ միջազգային բոլոր չափորոշիչներին համապատասխան կրթական գերազանցության պլատֆորմ, դրան համապատասխան ուսուցիչների սերունդ ձևավորել:
Նախարարից հետաքրքրվեցինք՝ ամեն տարի բուհերը հարյուրավոր մանկավարժներ են ավարտում, կանգնում աշխատանք գտնելու և ռեալիզացվելու խնդրի առաջ, ստիպված աշխատում սուպերմարկետներում: Ըստ Աշոտյանի՝ այս դեպքում բոլոր երկրներում կա խզում կրթական ծառայությունների և աշխատաշուկայի միջև: Այս խնդիրն առկա է նաև այլ երկրներում: Նախարարը նշեց՝ գաղտնիք չէ, որ մանկավարժական կրթության համար մեծամասամբ դիմում են ոչ առաջին հայտով, փորձում են ընդունվել առաջին հայտով նշած իրենց ուզած մասնագիտությամբ, որը սիրում են, ապա նոր երրորդ, չորրորդ տեղում մանկավարժությունն են նշում:
Ծրագիրը, նրա խոսքով, մանկավարժական կրթության արդիականացման վրա է հիմնված լինելու:
Ավելին՝ տեսանյութում:
Լուսանկարը` PAN Photo-ի