Մոսկվայում ձերբակալված արցախահայ գործարար Լևոն Հայրապետյանը մեկ-երկու ամսից ազատ կարձակվի: «Առաջին լրատվական»-ի հետ զրույցում նման կարծիք հայտնեց «Հայ-ռուսական համագործակցություն» կազմակերպության ղեկավար Յուրի Նավոյանը, ով այսօր մասնակցում էր Հայաստան-Սփյուռք խորհրդաժողովին:
Վերջինս ասաց, թե Մոսկվայում Լ. Հայրապետյանի ձերբակալությունը տեղի է ունեցել Ռուսաստանում տնտեսական որոշակի վերաբաշխման շրջանակներում: «Մասնավորապես՝ կապված ժամանակին «Բաշնևթ» ընկերության սեփականաշնորհման, հետագայում դրա վերանայման գործընթացի հետ: Ներկայումս խնդիր է դրված «Բաշնևթը» վերադարձնել պետությանը: Նախաձեռնողը եղել է Բաշկիրիայի կառավարությունը, որովհետև դեռևս 2003թ. ՌԴ հաշվիչ պալատն ունի եզրակացություն, թե «Բաշնևթ»-ի սեփականաշնորհումն աննախադեպ պետական թալան է: Եվ նույնիսկ Բաշկիրիայի նախկին նախագահ Մուրթազա Ռահիմովը 2005թ. կառավարությանը հանձնարարել էր պետական սեփականությանը վերադարձնել «Բաշնևթ»-ը: Ինչ-ինչ պատճառներով դա տեղի չի ունեցել, և հետո 2009-ին այն վաճառվել է «Սիստեմա» ընկերությանը: Այժմ Բաշկիրիայի հողօգտագործման և ընդերքի շահագործման նախարարությունը ներկայացրել է հայց՝ 7 միլիարդ դոլարի փոխհատուցման պահանջով: Եվ այդ ամբողջական շղթայում հիմա, փաստորեն, վերանայվում է սեփականաշնորհման այդ գործարքը:
Ցավոք, Լ. Հայրապետյանը, ինչպես մամուլն է հայտարարում, եղել է միջնորդ օղակ: Ներկայումս արդեն գիտեք, գործը հասել է «Սիստեմա» ընկերության տնօրեն Վլադիմիր Եվտուշենկովի ձերբակալմանը: Իսկ բուն սեփականաշնորհողի՝ Բաշկիրիայի նախկին նախագահի որդու՝ Ուրալ Ռահիմով նկատմամբ հայտարարված է միջազգային հետախուզում: Այսինքն՝ գործում ներգրավվել են բուն սուբյեկտները՝ Ուրալ Ռահիմովը՝ որպես սեփականաշնորհող, և Վ. Եվտուշենկովը՝ որպես գնորդ: Լ. Հայրապետյանը՝ որպես միջանկյալ օղակ, կարծում եմ՝ դուրս է գալու այս շղթայից, և մեղմվելու է նրա նկատմամբ մոտեցումը: Կարծում եմ նաև, որ մեկ-երկու ամսից ինքը՝ Լևոն Հայրապետյանը, ազատության մեջ կլինի և անձամբ կպատասխանի բոլոր հարցերին»,- ասաց Յու. Նավոյանը:
Նա ավելացրեց նաև, թե մինչև Լ. Հայրապետյանի ձերբակալությունը Բաշկիրիայի նախկին նախագահն ու նրա շրջապատը որոշակի ակտիվություն էին ցուցաբերում Բաշկիրիայի այս տարվա նախագահական ընտրություններում և դարձյալ ցանկանում էին մասնակցել սեպտեմբերի 14-ին տեղի ունեցած նախագահական ընտրություններին: Նրանց թիմը ցանկանում էր որպես նախագահի թեկնածու առաջադրել իրենց պաշտոնավարման շրջանի վարչապետին:
«Սակայն հուլիսի 9-ին՝ թեկնածուների գրանցման վերջին օրը, Բաշկիրիայի Կենտրոնական ընտրական հանձնաժողովը չգրանցեց Սարբաևի թեկնածությունը, կամ առաջադրող կուսակցությունը նրան ետ կանչեց: Ընդհանրապես՝ Բաշկիրիայի ներկա ղեկավարության և «Բաշնևթ»-ի սեփականաշնորհումը վերանայելու նախագահի որդեգրած քաղաքականությունը, այո, որոշակիորեն ուղղված է Մ. Ռահիմովի և նրա միջավայրի քաղաքական հավակնությունների զսպմանը: Ինչ վերաբերում Լ. Հայրապետյանի ձերբակալությանը, ապա դա բոլորիս համար շատ անսպասելի էր, որովհետև գոնե ինձ համար իմ ճանաչած Լ. Հայրապետյան երևույթը և հանցագործությունը անհամատեղելի են»,- եզրափակեց Յու. Նավոյանը:
Հիշեցնենք, որ Լ. Հայրապետյանը ձերբակալվել էր հուլիսի 15-ին՝ Մոսկվայի «Դոմոդեդովո» օդանավակայանում։ Նա մեղադրվում է «Բաշնևթ» ընկերության սեփականաշնորհման գործով հանցավոր ճանապարհով ձեռք բերված փողերի վատնման և լվացման մեջ: Գործարարի ձերբակալման համար հիմք էին ծառայել Բաշկիրիայից նախկին սենատոր Իգոր Իզմեստևի ցուցմունքները: Վերջինս ցմահ բանտարկություն է կրում մի շարք առանձնակի ծանր հանցագործությունների համար։
