«Մենք մեկ ժողովուրդ ենք, ճակատագրի բերմամբ մենք սփյուռքում ենք, բայց սա մեր հայրենիքն է, ես չեմ անջատում սփյուռքը հայրենիքից, մենք մի ժողովուրդ են, մենք հայրենիք ունենք և համաշխարհային ժողովուրդ ենք դարձել, դժբախտաբար: Եկեք դա օգտագործենք որպես առավելություն, որպեսզի կարողանանք 50-100 երկրների մեջ մեր ազգային շահերը պաշտպանել, Հայ դատն առաջ տանենք»,- այսօր «Առաջին լրատվական»-ի հետ զրույցում ասաց Հայաստան-Սփյուռք համահայկական 5-րդ համաժողովի շրջանակներում Հայաստանում գտնվող, «Կալիֆոռնիա կուրիեր» թերթի հրատարակիչ, խմբագիր Հարութ Սասունյանը:
Հարցին՝ բացի գումար հատկացնելուց, սփյուռքը պատասխանատվություն կրո՞ւմ է արդյոք հայրենիքի առջև, Հարութ Սասունյանը նշեց, որ, անշուշտ, պատասխանատվություն սփյուռքը կրում է: Նրա խոսքերով՝ փող տալն ամենահեշտ բանն է, բայց այն պետք է նպատակին ծառայի, դա պետք է պատասխանատու ձևով ծախսվի, պետք է, որ առաջնահերթությունները ճշտվեն, և ոչ ոք իրավունք չունի ինքնագլուխ անելու այս բանը՝ ո՛չ հայրենի ղեկավարությունը, ո՛չ սփյուռքը:
«Որպես մեկ ժողովրդի զավակներ՝ հոգով կանք միասին և մասին որոշեք առաջնահերթությունները, ծրագրերը, արդյունավետությունը: Այդպիսի բան չկա, որ որևէ մեկը միայն փող ուզի… ինչպես ասում են՝ սփյուռքը կթան կով չէ, սփյուռքը մեր հայրենիքն է, մենք օգնում ենք ոչ թե իշխանությանը, այլ ժողովրդին: Մեր ժողովուրդը պետք է հանգիստ ապրի, բարգավաճի»,- ասաց Հարութ Սասունյանը:
Ի՞նչն է խանգարում, որ մենք այդ արդյունքները չենք տեսնում։ Ի պատասխան՝ Հարութ Սասունյանը նշեց, թե պատճառներից մեկն այն է, որ մենք համերաշխ չենք իրար հետ, փոքր ժողովուրդ ենք և բաժան-բաժան ենք, տարբեր տեսակի անձնական, կուսակցական, քաղաքական հարցեր կան: Ըստ նրա՝ մենք կարող ենք ունենալ տարանջատումներ, տարակարծիք լինել, բայց եթե հայրենիքի շահերը կան, պետք է կողք կողքի կանգնենք, աշխատենք, թեկուզ համաձայն չլինենք շատ հարցերում:
Նա բերեց Իսրայելի օրինակը. թեև հրեաների մեջ էլ պառակտում կա, բայց երբ Իսրայելի գոյության, լինել-չլինելու հարցը կա, բոլորը աշխարհով մեկ քով քովի գալիս են, պաշտպանում են հայրենիքը թշնամիներից: «Մենք էլ կարող ենք վեճեր ունենալ, տարբեր գաղափարներ, ես դեմ չեմ ազատ խոսքին, ազատ կամքին, և մենք կարող ենք ընդդիմություն լինել կամ իշխանություն, բայց հայրենիքին չվնասենք»,- ասաց նա՝ հավելելով, որ, ի տարբերություն մեզ, հրեաները լավ կազմակերպված են, համախմբված, իրենք ավելի մեծ ուժ ունեն սփյուռքում, քան մենք, իրենք ամեն ինչ անում են իրենց հայրենիքի համար:
Գլխավոր տարբերությունը , ըստ նրա, այն է, որ հայ ժողովուրդը ընդհանրապես ավելի խոսող է, քան գործող, հայրենասեր ենք խոսքով, բայց հրեաները իրենց գործով, իրենց փողով, իրենց մասնակցությամբ փաստում են, որ հայրենասեր են:
«Մենք խոսքով ենք հայրենասեր, բայց խոսքը օգուտ չունի, և շատ մարդիկ նույնիսկ վնաս են տալիս խոսքով, քանի որ խոստումներ են տալիս և չեն իրագործում դրանք»,- ասաց նա: