Apple ընկերությունն Apple TV հեռուստահարթակի (երրորդ սերնդի) ծրագրային ապահովման նորացում է թողարկել, հայտնում է hitech.vesti.ru-ն: Նորույթը սարքին տվել է iOS-ի ոճով «թարմ» դիզայն՝ բարակ գրությունների տառատեսակով և հարթ պատկերներով, նաև Beats Music՝ երաժշտական ծառայության ալիք, որն Apple-ը գնել է օգոստոսին:
Apple TV-ն մի շարք գործառույթներ ժառանգել է iOS 8-ից: «Ընտանեկան հասանելիությունը» հնարավորություն է տալիս Apple ID մի քանի էջ միավորել մեկ խմբում և մեկ կրեդիտ քարտով վճարել երաժշտության, ֆիլմերի և հեռուստահաղորդումների համար: iTunes-ում, iBooks-ում և App Store-ում ձեռք բերված կոնտենտը կհամակցվի ընտանիքի բոլոր անդամների (մինչև 6 մարդ) սարքերի հետ:
Հեռուստահարթակներով արդեն հնարավոր է բացել Apple պլանշետով և iPhone-ով արված լուսանկարները:
Նորացումը հասանելի է միայն երրորդ սերնդի Apple TV-ի համար: Սպասվում է, որ հեռուստահարթակի նոր մոդելը կներկայացվի հոկտեմբերի 21-ին iPad և iPad mini նոր պլանշետների հետ:
