Windows 8.1 օպերացիոն համակարգի պաշտպանվածությունը թույլ տեղեր ունի, որը հնարավորություն է տալիս այն շրջանցել կամ նույնիսկ ամբողջովին ապաակտիվացնել: Այս մասին հայտնում է Lenta.ru-ն՝ հղում անելով Positive Technologies IT-ընկերության հաղորդագրությանը:
Վկայակոչելով իր աշխատակիցների հետազոտության արդյունքները՝ ընկերությունը հայտարարել է, որ Windows 8.1-ում ներդրված Microsoft PatchGuard մոդուլը (կամ Kernel Patch Protection-ը, KPP) չի ապահովում համակարգի լրիվ պաշտպանվածությունը:
Positive Technologies-ի հետազոտական ստորաբաժանման փորձագետները հարձակումների մի քանի սցենար են պարզել, որոնք հնարավորություն են տալիս խափանել KPP-ի պաշտպանվածությունը: Նրանց գնահատմամբ՝ բավարար որակավորում ունեցող պոտենցիալ չարագործը կարող է դրայվեր գրել, որն ընտրողաբար կկիրառի բերված տեխնիկաներից մեկը կամ մի քանիսը և այդպիսով ամբողջովին կարգելափակի KPP-ի մեխանիզմները:
Միաժամանակ՝ մասնագետները կարծում են, որ չնայած Windows 8.1-ի պաշտպանվածությունը խափանելու հնարավորությանը՝ դա պահանջում է պոտենցիալ ցանցահենի լուրջ մակարդակ: