Օրեր առաջ Քրեակատարողական վարչության պետ նշանակված Արթուր Օսիկյանը արդեն իսկ սկսել է ՔԿ վարչությունում սեփական թիմը հավաքելու գործընթացը: Մասնավորապես, նշանակվելուց կարճ ժամանակ անց նա ոստիկանության Անձնագրային և վիզաների վարչության իր մտերիմ մի քանի աշխատող է արդեն իսկ աշխատանքի ընդունել, ինչպես նաև մի քանի աշխատող ոստիկանության համակարգից:
Այս օրերին իր նշանակմանն է սպասում Օվիր-ի պետի տեղակալ Արսեն Համբարձումյանը, քանի որ նա ևս համարվում է Օսիկյանի «մարդկանցից»: Երբ ամիսներ առաջ անձնագրային և վիզաների վարչությունում ստուգումներ եղան, չարաշահումներ և թերացումներ հայտնաբերվեցին, Համբարձումյանին մի կերպ հաջողվեց սպրդել ազատման վտանգից: Մինչդեռ վարչության պետը՝ Նորայր Մուրադխանյանը, իր երկու տեղակալներով լքեց վարչությունը:
Հիմա բավական հետաքրքիր իրավիճակ է ստեղծվել ՔԿ վարչությունում: Ոստիկանական կադրերով համալրելը լուրջ դժգոհություն է առաջացնում համակարգի ներկայացուցիչների, ՔԿՀ պետերի շրջանում: Որոշ տեղեկություններով՝ ՔԿՀ-ների պետերը առաջիկայում որոշել են հավաքվել և հանդիպել Օսիկյանի հետ՝ բացատրելու, թե ինչ է իրենից ներկայացնում քրեակատարողական վարչությունը, հիմնարկները, ինչ է իրենից ներկայացնում դատապարտյալների հետ աշխատանքը, որում ոստիկանության համակարգի աշխատողները ընդհանրապես փորձ չունեն, և որ եթե համակարգը շարունակվի համալրվել ոստիկանական կադրերով, ապա դա ոչ մի լավ բանի չի բերի, այլ կբերի նրան, որ համակարգը կսկսի չաշխատել:
