Բրիտանացի տասնյակ իմամներ և այլ մուսուլման առաջնորդներ կոչ են արել ազատ արձակել առևանգված սոցաշխատող Ալան Հեննինգին, գրում է The Independent-ը: Համատեղ հայտարարությունը ստորագրել են իսլամի տարբեր հոսքերի ներկայացուցիչներ, այդ թվում՝ շիաներ, սուննիներ, սալաֆիտներ և սուֆիստներ, նշում է թերթը:
Հեննինգին առևանգողներին խնդրում են ազատել բրիտանացուն, հակառակ դեպքում նրանք դիմում են իսլամի դեմ «ամենադատապարտելի» մեղքն իրագործելու ռիսկին, ասվում է հայտարարության մեջ: «Պրն Հեննինգը կամավոր էր, որը մեկնել էր Սիրիա անմեղ քաղաքացիական անձանց օգնելու»,- նշել են ուղերձի հեղինակները:
Բրիտանացի սոցաշխատողին ազատելու ևս մեկ խնդրանքով ուղերձ հղել է Հեննինգի ընկերը, որն իրեն կոչում է Աբու Աբդուլլա, գրում է The Guardian-ը:
Նրա խոսքով՝ Հեննինգը բաց է թողել իր ընտանիքի հետ Ծննդյան տոնը, որպեսզի օգնի «մեր եղբայրներին և քույրերին Սիրիայում»: «Նա ընտանիքի մարդ է: Նա լավ մարդ է»,- ավելացնում է Աբդուլլան և «Իսլամական պետությանը» կոչ է անում ազատել բրիտանացուն:
Ավելի վաղ հաղորդվում էր, որ «Ալ-Քաիդա» խմբավորումն «Իսլամական պետությանը» կոչ է արել ազատել Հեննինգին, քանի որ նրան համարել է «անմեղ սոցաշխատող, որն անկեղծորեն փորձել է օգնել տառապող մուսուլմաններին»:
