Հայաստանում ԱՄՆ դեսպանի թեկնածու Ռիչարդ Միլսը դեսպանի պաշտոնում հաստատվելու դեպքում կաշխատի՝ հենվելով իր նախորդների ձեռքբերումների վրա: Այս մասին նա ասել է ԱՄՆ Սենատի արտաքին հարցերով հանձնաժողովի առջև ելույթ ունենալիս՝ փոխանցում է Հայաստանում ԱՄՆ դեսպանատան կայքը:
Նրա խոսքով՝ Հայաստանում ամերիկյան քաղաքականության նպատակը պարզ է՝ ունենալ ազատ և բարգավաճ Հայաստան, որը խաղաղության մեջ կլինի հարևանների հետ: «Այդ նպատակի իրագործումը նշանակում է օգնել Հայաստանին՝ ուժեղացնելու իր ժողովրդավարությունն ու օրենքի գերակայությունը, ազատականացնելու տնտեսությունը, ընդլայնելու առևտուրը և գրավելու դիվերսիֆիկացված օտարերկրյա ներդրումներ, կարգավորելու Լեռնային Ղարաբաղի հակամարտությունը խաղաղ ճանապարհով՝ Մինսկի խմբի օգնությամբ, հաշտեցնելու նրան հարևան Թուրքիայի հետ»,- ասել է Միլսը՝ հավելելով, որ դրանք կլինեն իր առաջնահերթությունները:
Միլսը նշել է, որ չնայած ԱՄՆ-ն իր հիասթափությունը հստակ կերպով արտահայտել է Հայաստանի վերջին մի քանի որոշումների վերաբերյալ, որոնցից մեկը առնչվում է ռուս-ուկրաինական հարցով ՄԱԿ-ի Գլխավոր ասամբլեայում կայացած քվեարկությանը, Հայաստանի հետ ուժեղ երկկողմ հարաբերություններ ունենալու ամերիկյան կառավարության հակվածությունը մնում է անփոփոխ:
Նրա խոսքով՝ 2013-ի սեպտեմբերին Հայաստանի կայացրած որոշումը՝ Եվրասիական տնտեսական միությանը միանալու մասին, ընդգծել է Հայաստանի տարածաշրջանային մեկուսացումը նվազեցնելու իրենց նպատակների իրագործման և Հայաստանի տնտեսական ու անվտանգության անկախության ամրապնդման անհրաժեշտությունը:
Այս տարի նշվում է Հայաստանի և Թուրքիայի միջև դիվանագիտական հարաբերությունների հաստատման և երկկողմ հարաբերությունների զարգացման արձանագրությունների ստորագրման 5-րդ տարին: «Մենք շարունակում ենք ընդգծել այդ արձանագրությունների վերջնական հաստատման կարևորությունը՝ առանց նախապայմանների կամ որևէ այլ հարցերի հետ կապելու»,- ասել է Միլսը:
