«Ժառանգություն» կուսակցությունը նախօրեին «Կոնգրես» հյուրանոցում լայնածավալ քննարկում էր կազմակերպել սահմանադրական բարեփոխումների թեմայով, որին մասնակցում էին ինչպես Հայաստանի քաղաքական դաշտի բոլոր կուսակցություններից, այնպես էլ հասարակական սեկտորից և Սահմանադրական բարեփոխումների մասնագիտական հանձնաժողովի անդամներ:
Նշենք, որ «Ժառանգությունը» մեկ անգամ չէ, որ դեմ է արտահայտվել սահմանադրական բարեփոխումներին: Այսօր կուսակցության փոխնախագահ Արմեն Մարտիրոսյանից հետաքրքրվեցինք՝ դեմ լինելով հանդերձ նման քննարկում կազմակերպելով արդյո՞ք «Ժառանգությունը» չի լեգիտիմացնում իշխանությունների բարեփոխումների պլանը: «Ոչ, չի լեգիտիմացնում, մենք բովանդակային քննարկման մեջ չենք մտնում: Մենք ընդամենը մեր դիրքորոշումն ենք ևս մեկ անգամ արտահայտում՝ հնարավորություն տալով քաղաքական դաշտի մեր գործընկերներին հայտնելու իրենց դիրքորոշումը, քանի որ սահմանադրական փոփոխությունները ոչ այնքան իրավական, որքան քաղաքական փոփոխություններ են»,- ասաց Արմեն Մարտիրոսյանը՝ նկատելով, որ իրենք ոչ թե դեմ են բարեփոխումներին, այլ դեմ են «չարափոխումներին»: «Մեր իշխանությունները հայտնի են ամենալավ գաղափարը վարկաբեկելու իրենց վարպետությամբ: Հայտնի են մեկ նախադասության մեջ ստորակետը տեղափոխելով ամբողջ լուծումները փչացնելով և իրենց ցանկացածն առաջ տանելով: Մենք սրան ենք դեմ: Իսկ դրանից զատ մենք եղել ենք և կմնանք պարլամենտական կառավարման համակարգի կողմանակից»,- հավելեց «Ժառանգության» փոխնախագահը: Վերջինիս խոսքով, սակայն, վտանգ կա, որ խորհրդարանական համակարգն էլ այս իշխանությունների օրոք կվարկաբեկվի, ինչպես կիսանախագահականը՝ նախորդ իշխանությունների օրոք:
Ամեն դեպքում, եթե բարեփոխումների նախագիծն այս տեսքով, ինչպես որ կա, դրվի հանրաքվեի, որո՞նք կլինեն «Ժառանգության» գործողությունները՝ հարցրինք Մարտիրոսյանին։ «Երբ ամբողջական կլինի, այդ ժամանակ էլ մեր մոտեցումը կհայտնենք, բայց մենք բովանդակային քննարկման մեջ չենք մտնելու: Ակնհայտ է, որ սողանցքներ լինելու են: Որքան էլ աշխատանքային խումբը փորձի նորմալ նախագիծ ներկայացնել, մեկ է, ընթացքում դա էնպես է ձևափոխվելու, որ միանշանակ հարմարեցվելու է իշխանությանը և հատկապես Սերժ Սարգսյանին: Իսկ մենք Հայաստանում խնդիրների լուծման մեկ ճանապարհ ենք տեսնում՝ իշխանափոխությունը, որը անհրաժեշտ քայլ է: Բոլոր խնդիրների լուծման առաջին քայլը պետք է լինի արմատական իշխանափոխությունը»,- ասաց Մարտիրոսյանը: