Իրանն ակնկալում է «վեցյակի» հետ առաջիկա բանակցություններում հասնել պայմանավորվածության, որը կառաջարկի երկրի միջուկային ծրագրի մշակման սահմանափակման և վերահսկման հավելյալ միջոցառումների ներմուծում 10 տարուց քիչ ժամկետով: Այս մասին լրագրողներին Նյու Յորքում հայտնել է Իրանի արտգործնախարար Մուհամմադ Ջավադ Զարիֆը՝ փոխանցում է ITAR-TASS-ը:
Նրա խոսքով՝ իրենք մտադիր են շարունակել բանակցությունները: «(Ուրանի) հարստացման մեր ծրագիրը խաղաղ է և հետապնդում է շատ հստակ նպատակներ»,- ասել է նա: «Համաձայնագիրը, որի կնքմանը մենք բոլորս ձգտում ենք հասնել, վերջնական նպատակ չէ. դա գործիք է՝ ստեղծելու անհրաժեշտ վստահություն»,- ասել է նա:
«Եկեք ստեղծենք մեխանիզմ, թող այն հաշվարկված լինի մի քանի տարով, բայց՝ ոչ 10, ոչ 15. քիչ ժամկետով ես կկարողանամ համաձայնել»,- ասել է Զարիֆը: