Երևան-Սևան մայրուղու վրա, հանրությանն ավելի հայտնի «Չայնիի պերևալ» կոչվող հատվածի հարևանությանբ գտնվող սարի վրա տևական ժամանակ է՝ մի քանի այլ մանր գրառումներից զատ, սպիտակ քարերով գրված էր «Բարգավաճ Հայաստան»: Այդ գրառումը աչքի է ընկնում իր մեծությամբ և մեծ հեռավորությունից էլ ընթեռնելի է:
Սակայն վերջերս այդ գրառումն անհետացավ սարի դոշից, և անգամ Ֆեյսբուքում հայտնվեցին դրա մասին փաստող լուսանկարներ: Սակայն գրառումն անհետանալուց կարճ ժամանակ անց Աբովյանի քաղաքապետ Կարապետ Գուլոյանի ջանքերով այն վերականգնվել է, քանի որ ԲՀԿ առաջնորդ Գագիկ Ծառուկյանն այդ կողմերով անցնելիս պատահաբար նկատել էր, որ գրառումն անհետացել է: Նա հանձնարարել էր Աբովյանի իր փեսա քաղաքապետ Կարո Գուլոյանին անմիջապես վերականգնել գրառումը, որը և կատարվել էր: Ապա վերականգնելուց կարճ ժամանակ անց՝ գիշերով, կրկին անհայտ անձինք քանդել և հավաքել էին սպիտակ քարերով գրված «Բարգավաճ Հայաստանը», որը կրկնակի բորբոքել էր Գուլոյանի զայրույթը, և նա քաղաքապետարանի աշխատակազմի հետ կրկին վերականգնել էր այն: Բայց գրառումը վերացնողներն ավելի համառ էին գտնվել և երրորդ անգամ էին ջնջել այն՝ կրկին գիշերով և բոլորի աչքից հեռու:
Սակայն ԲՀԿ-ական քաղաքապետն ավելի հնարամիտ է գտնվել և «Բարգավաճ Հայաստանը» սարի դոշին դաջել է բետոնով, որ այլևս հնարավոր չլինի մաքրել գրառումը, ինչը պարզապես զավեշտալի է և միայն ծիծաղ է հարուցում: