Լոնդոնի քաղաքապետարանն այս տարվանից առաջին անգամ վճար կսահմանի ամանորյա հրավառությունը դիտելու համար: Այս մասին հայտնում է Ria Novosti-ն:
«Անցած տարի հրավառությունն այնքան մարդու մեկտեղեց, որ դա անհավանական ծանրաբեռնվածություն ստեղծեց տրանսպորտային, անվտանգության ապահովման ենթակառուցվածքների համար: Վթարային ծառայությունների և Transport for London տրանսպորտային ձեռնարկության հետ խորհրդակցություններից հետո մենք եկանք այն եզրակացության, որ այդ միջոցառումը ներկա ձևով թողնել չի կարելի»,- հայտարարել է քաղաքապետարանի ներկայացուցիչը:
Այժմ նրանց թիվը, ովքեր առավել հարմար դիրքերից կդիտեն հանրահայտ հրավառությունը, կսահմանափակվի մինչև 100 հազար: Համեմատության համար նշվում է, որ անցած տարի Թեմզայի ափ հրավառությունը դիտելու է գնացել մոտ կես մլն մարդ:
Հրավառության տոմսերը կվաճառվեն 10 ֆունտ ստերլինգով: Վաճառքը կսկսվի սեպտեմբերի 26-ի ուղիղ կեսօրին:
