Առաջիկա 6 ամիսներին կավարտվի Պարսաբադ-Իմիշլի էլեկտրամատակարարման գծի շինարարությունը, ինչը թույլ կտա մեծացնել Արբեջանի և Իրանի միջև էներգափոխանակության հզորությունը մինչ 600 մեգավատտի: Այս մասին հայտարարվել է Թեհրանում՝ Իրանի էներգետիկայի նախարար Բիժան Նամդար Չիտչիյանի հետ Ադրբեջանի էկոնոմիկայի նախարար Շահին Մուստաֆաևի հանդիպմանը՝ փոխանցում է IRNA գործակալությունը:
Նշված նախագծում երկու կողմերը խոշոր ներդրումներ են արել: Դրա իրականացումը կբարձրացնի երկու երկրների միավորված էներգահամակարգի կայությունը: Կողմերը ծրագրում են նաև սահմանային գոտում կառուցել 1000 մեգավատտ հզորությամբ էլեկտրակայան:
Որոշվել է հարցն ուսումնասիրել փորձագիտական մակարդակով և նախապատրաստել հստակ առաջարկներ:
Կողմերը նաև քննարկել են էներգիայի այլընտրանքային աղբյուրների կիրառման հնարավորություններն ու այդ ոլորտում համագործակցության հեռանկարները:
Ադրբեջանը պատրաստ է ներդրում անել Իրանի այլընտրանքային աղբյուրներից էներգիայի արտադրության ոլորտում:
Թեհրանում բանակցություններից հետո ադրբեջանական պատվիրակությանն ընդունել է Իրանի նախագահ Հասան Ռուհանին:
