Ռուսաստանում հարուցված, այսպես կոչված, «Բաշնեֆտի» գործով երեկ ներգրավվել է «Սիստեմա» ընկերության տնօրենների խորհրդի նախագահ Վլադիմիր Եվտուշենկովը: Նրան մեղադրում են անօրինական գումարների լեգալացման մեջ: Սա այն գործն է, որով ձերբակալվեց և կալանավորվեց հայազգի հայտնի ռուսաստանցի գործարար, բարերար Լևոն Հայրապետյանը: Մի քանի օր առաջ Հայրապետյանին նոր մեղադրանք ներկայացրին, իսկ խափանման միջոցը փոխելու հայցը մերժեցին:
Ռուսաստանի իրավապահները համարում են, որ «Սիստեմա» ընկերությունը 2008 թվականին անօրինականություններ է թույլ տվել «Բաշնեֆտ» ընկերության սեփականատեր դառնալիս: Այս գործը ռուսաստանյան փորձագիտական շրջանակներն արդեն իսկ որակել են որպես «Ռոսնեֆտ» ընկերության շահերի հետապնդում: «Ռոսնեֆտը» ցանկանում է տիրանալ «Բաշնեֆտին», որի սեփականատերը ներկայումս «Սիստեմա» ընկերությունն է: Ինչպես երևում է, այս գործը թափ է հավաքում, ինչի վկայությունն այն է, որ ներգրավվում է նաև «Սիստեմայի» ղեկավարը: Նրան տնային կալանք են տվել` արգելելով հարազատներից ու փաստաբաններից, նաև քննիչներից բացի` հարաբերվել որևէ այլ անձանց հետո, արգելելով օգտվել ինտերնետից:
Հետաքրքրականն այստեղ այն է, որ Եվտուշենկովը ներկայումս ՀՀ նախկին նախագահ Ռոբերտ Քոչարյանի, ըստ էության, ղեկավարն է: Այսինքն` Քոչարյանը, ինչպես մի քանի տարի առաջ հարցազրույցներից մեկում էր նշել, աշխատանքի է անցել Ռուսաստանում: Նա «Սիստեմա» ընկերությունների տնօրենների խորհրդի անդամ է, և հետևաբար խոհրդի նախագահի ձերբակալումը ինչ-որ առումով նշանակում է Քոչարյանի ղեկավարի ձերբակալում: Սա իմիջիայլոց, որովհետև ըստ էության գործը, որ հարուցվել է, վերաբերում է այն ժամանակաշրջանին, երբ Ռոբերտ Քոչարյանը դեռևս «Սիստեմայում» աշխատանքի չէր անցել: Սակայն, այնուհանդերձ, կասկածից վեր է, որ «Սիստեմա» ընկերության դեմ Ռուսաստանում սկսված արշավը կարող է անդրադառնալ նաև Ռոբերտ Քոչարյանի վրա` առնվազն հոգեբանորեն:
Միշտ էլ հաճելի չէ, երբ ընկերությունը, որում աշխատում ես, հայտնվում է նմանօրինակ պատմությունների մեջ: Առնվազն առաջանում է աշխատանք կորցնելու վտանգ, այսինքն` Ռոբերտ Քոչարյանը կարող է արդյունքում մնալ գործազուրկ: Իսկ նման դեպքում նա կարող է արդեն աշխատանք փնտրել Հայաստանում, կամ այլ կերպ ասած՝ մնալով գործազուրկ, նա կարող է ավելի ուժգին փափագել Հայաստանում իշխանություն վերադառնալ: Սակայն մյուս կողմից` «Սիստեմայի» խնդիրները և քրեական գործը, որ հարուցվել է ընկերության դեմ, կարող են բացասական ազդեցություն ունենալ Ռոբերտ Քոչարյանի քաղաքական պլանների վրա` թեկուզ և նույն հոգեբանական տեսանկյունից:
Այսպես, թե այնպես, Ռուսաստանում իրադարձությունները շատ հետաքրքրական ձևով են զարգանում. այնտեղ կարծեք թե տեղի է ունենում քաղաքական ուժերի հարաբերակցության փոփոխություն, և լայն թափով առաջնային դիրքեր է դուրս գալիս Իգոր Սեչինը իր «Ռոսնեֆտով»: Իսկ հաշվի առնելով Ռուսաստանի ազդեցությունը Հայաստանի քաղաքական ուժերի վրա, կարող ենք ասել, որ այս փոփոխությունները չեն կարող իրենց արտացոլումը չունենալ Հայաստանի ներքաղաքական գունապնակում:
Անպայման չէ, գունապնակի փոփոխության կամ գույները խառնելու տեսքով: Չի բացառվում ընդամենը երանգների փոփոխության: Ամեն ինչ, իհարկե, կախված է այն դինամիկայից, որով կզարգանան իրադարձությունները Ռուսաստանում, մասնավորապես «Սիստեմա»-«Ռոսնեֆտ» հակադրության գործով:
