«Հրապարակ» թերթը գրում է. «Ահավոր հիասթափված եմ և անտրամադիր, տորթի սիրահարների հերթական հավաք… ուղղակի զզվեցի: Այդ «բարեփոխումները» կանխելու միակ ելքը համատարած կոնսոլիդացիան է, բայց ի՜նչ են դրել ու քննարկում…». խոսքն իշխանական տորթի մասին է, իսկ խոսքերի հեղինակը՝ ԲՀԿ-ական Վարդան Բոստանջյանը, ում նյարդերը, հավանաբար, տեղի տվեցին, և նա կեսից լքեց «Ժառանգություն» խմբակցության «Սահմանադրական բարեփոխումներ. թեր և դեմ» թեմայով երեկվա խորհրդաժողովը: Բոստանջյանին հիասթափվելու առիթ տվողը, ըստ ամենայնի, ոչ իշխանականների անակնկալ հայտարարություններն էին, մինչ այդ տպավորություն կար, որ խորհրդարանական քառյակի առնվազն երեք ուժերը՝ ԲՀԿ-ն, ՀԱԿ-ը և «Ժառանգությունը», դեմ են սահմանադրական բարեփոխումներին, քանի որ այդ փոփոխությունների հիմնական նպատակը համարում են Սերժ Սարգսյանի վերարտադրությունը, և որպեսզի կանխեն վերարտադրումը, որոշել են տապալել սահմանադրական փոփոխությունների հանրաքվեն: Վերջին ամիսներին նրանք ուղղակի և անուղղակի ակնարկում էին, որ Սերժ Սարգսյանը նախաձեռնել է սահմանադրական փոփոխություններ, որպեսզի փոխի կառավարման գործող համակարգը, այն կիսանախագահականից դարձնի խորհրդարանական և ինքն էլ դառնա խորհրդարանի և, այդպիսով, երկրի փաստացի ղեկավար:
Մինչդեռ Վենետիկի հանձնաժողովի դատին հայեցակարգը ներկայացնելուց առաջ ԱԺ բոլոր խմբակցությունների ներկայացուցիչների, սահմանադրական բարեփոխումների հանձնաժողովի անդամների, փորձագետների մասնակցությամբ երեկ կազմակերպված քննարկումն այլ ընթացք ստացավ: Ոչ իշխանականներից շատերը, պարզվեց, կատեգորիկ դեմ չեն փոփոխություններին, անշուշտ՝ որոշակի նախապայմաններով:
Մանրամասները՝ թերթի այսօրվա համարում
Լուսանկարը՝ Pan Photo-ի