Իսպանիայի արտաքին գործերի նախարար Խոսե Մանուել Գարսիա Մարգալյոն հայտարարել է, որ կառավարությունը ոչ մի օրինական միջոցի, այդ թվում` նրան ինքնավարության կարգավիճակից զրկելու առջև կանգ չի առնի Կատալոնիայի անկախացումը թույլ չտալու համար: Այս մասին հաղորդում է Europa Press գործակալությունը:
«Գիծ կա, որը չպետք է անցնել: Կառավարությունը կգործածի իրեն հասանելի բոլոր օրինական մեթոդները անջատողական հանրաքվեի իրականացումը թույլ չտալու համար, որը հակասում է իսպանական իրավական համակարգին, և որը Կատալոնիայի, Իսպանիայի և Եվրամիության համար կունենա ամենաանբարենպաստ հետևանքները»,- ասել է նախարարը:
«Իսպանիայի միասնականությունը կառավարության կամ խորհրդարանի սեփականությունը չէ»,- ասել է նախարարը` հավելելով, որ այն ամրագրված է սահմանադրությամբ:
