Վերաքննիչ քրեական դատարանում մեկ դատական նիստով ավարտվեց Վոլոդյա Ավետիսյանի գործով բերված վերաքննիչ բողոքի քննությունը:
Բողոքը բերել էր Վոլոդյա Ավետիսյանի շահերի պաշտպան Արա Զաքարյանը:
Գործը քննվել է Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում՝ Լևոն Ավետիսյանի նախագահությամբ:
Ըստ դատական ակտի՝ 50-ամյա Վոլոդյա Ավետիսյանը, հանդիսանալով պահեստազորի գնդապետ, խարդախությամբ հափշտակություն կատարելու ուղղակի դիտավորությամբ, կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ վստահությունը, դիմել է խաբեության ու մի դեպքում հափշտակել է գումար, մի դեպքում էլ կատարել է հափշտակության փորձ:
Վոլոդյա Ավետիսյանը մեղավոր է ճանաչվել խարդախության և խարդախության փորձի համար՝ ՀՀ քրեական օրենսգրքի 178 հոդվածի 2-րդ մասի 2-րդ և 5-րդ, 34-178 հոդվածի 2-րդ մասի 5-րդ կետերով:
6 երեխաների հայր, զինվորական ծառայությունների համար բազմաթիվ պարգևների արժանացած պահեստազորի գնդապետը վերջին հաշվով դատապարտվել է 6 տարի ազատազրկման:
Ըստ պաշտպանի՝ չի հաստատվել Վոլոդյա Ավետիսյանի մեղքը, դատարանը այս գործով պետք է կայացներ արդարացման դատավճիռ:
Իր վերաքննիչ բողոքում պաշտպանը խնդրել էր բեկանել դատավճիռը, գործն ուղարկել նույն ստորադաս դատարան՝ այլ կազմով նոր քննության: Կամ՝ բեկանել դատավճիռը և կայացնել արդարացման դատավճիռ: Կամ, եթե դատական երկրորդ ատյանը հաստատված գնահատի Վոլոդյա Ավետիսյանի մեղքը, հաշվի առնել բազմաթիվ մեղմացնող հանգամանքները՝ վեց երեխա խնամքին ունենալը, հայրենիքին ծառայելու գործում ունեցած ներդրումը, բազմիցս պարգևատրված լինելը, և Ավետիսյանին դատապարտել կատարածին համաչափ մեղմ պատժի, նրա նկատմամբ համաներում կիրառել ու ազատել պատժի կրումից:
Վերաքննիչ քրեական դատարանը պաշտպանի բերած վերաքննիչ բողոքը մերժեց:
Ընդհանուր իրավասության դատարանի դատավճիռը՝ 6 տարի ազատազրկումով, թողնվեց օրինական ուժի մեջ անփոփոխ:
Ըստ Վոլոդյա Ավետիսյանի համախոհների՝ իշխանությունը նպատակ է դրել Վոլոդյա Ավետիսյանի ու նրա ընտանիքի համար ստեղծել ծանր պայմաններ…