Դատարանը կալիֆոռնիացի նկարիչ Դևիդ Ուիլյամ Նոլին, որը վնասել է փողոցային հայտնի նկարիչ Բենքսիի՝ Յուտա նահանգի Փարք-Սիթի քաղաքում ավտոտնակի պատին արված երկու գրաֆիտիները, մեղավոր է ճանաչել վանդալիզմի համար: Այս մասին հայտնում է Associated Press-ը:
Նոլը պետք է 13.000 դոլար գնահատված վնասը փոխհատուցի մինչև գործով եզրափակիչ լսումը՝ 2014-ի նոյեմբերի 17-ը, կամ մեղադրող կողմը կպահանջի ազատազրկման ձևով պատիժ:
Նոլը խոստովանել է, որ 2013-ի դեկտեմբերի 31-ի նախօրեին ինքը շագանակագույն աերոզոլային ներկով ներկել է գրաֆիտիներից մեկը և կոտրել է երկրորդի վրա դրված զրահապատ ապակին: Տղամարդու խոսքով՝ այդ պահին ինքը երկբևեռ խանգարման նոպայի մեջ է եղել ու գրեթե ոչինչ չի հիշում:
Ավելի վաղ 35-ամյա Դևիդ Ուիլյամ Նոլը պայմանականորեն դատապարտվել է 5 ամսվա ազատազրկման Լոս Անջելեսում Բենքսիի այլ աշխատանքներ ներկելու համար: Այդ ամենը նա նկարահանել է և տեսանյութը տեղադրել YouTube-ում: Նա հայտարարել է, որ ատում է ժամանակակից արվեստն ու վրդովված է համընդհանուր ուշադրությամբ, որը գրավում է Բենքսիի գործունեությունը: