Խաղաղ Դոնի 19 շենքի դիմաց բուլդոզերով քանդել են կանաչ տարածքը. այդ տարածքում է գտնվում նաև զոհված ազատամարտիկ Մուշեղ Մխոյանի՝ Վոժդի արձանը, որին բուլդոզերը «դեռ չէր հասել»:
Բնակիչները «Առաջին լրատվական»-ի հետ զրույցում նկատեցին, որ վաղ առավոտից չէին կարողանում հասնել նրան, որ աշխատանքները դադարեցվեն, սակայն զանգահարել են աշխատողներից մեկին, և քանդման գործընթացը դադարեցվել է: Մինչ աշխատանքները դադարեցնելը՝ քանդող անձինք ցույց են տվել կառուցապատման թույլտվությունը՝ քաղաքապետի ստորագրությամբ: Կառուցապատողը «Միռոար» ՍՊԸ-ն է, իսկ թե ինչ է կառուցվելու՝ պարզ չէ:
Երբ փորձում էինք առավել հանգամանալից պարզել, թե ինչ է կատարվում, հանկարծ հայտնվեց մի կին, որը հրաժարվեց ներկայանալ՝ միայն ասելով, թե Մուշեղ Մխոյանի՝ Վոժդի դուստրն է: Այս տիկինը հայտարարեց, որ տարածքն իրեն է. «Այստեղ չի քանդվելու, ես եմ հասել նրան, որ աշխատանքները դադարեցվեն»:
Տիկնոջ խոսքով՝ քաղաքապետի ստորագրությունը կեղծված է, չի կարող կառուցապատող լինել, քանի որ տարածքը իրենն է: Զավեշտալին այն է, որ այս տիկինը չէր թողնում անգամ բնակիչներին հարցեր տալ, ասում էր՝ սխալ բան են ասում: Իսկ բնակիչները ընդգծում էին. «Սա բարբարոսություն է, չգիտենք՝ թույլտվությունը ով է տվել՝ քաղաքապետը, թե օգնականը, բայց սա վիճակ չէ»:
Բնակիչների այս պնդումներից հետո ազատամարտիկի դուստրը բարկացած հորդորեց՝ քաղաքապետի անունը չտաք, նա կապ չունի այս ամենի հետ:
Առավել մանրամասն՝ տեսանյութում: