Ֆրանսիայի Ազգային ժողովի (խորհրդարանի ստորին պալատ) պատգամավորներն այսօր կքվեարկեն վարչապետ Մանուել Վալսի ղեկավարած նոր կառավարությանը վստահության քվե տալու հարցը: Այս մասին հայտնում է RIA Novosti-ն:
Խորհրդարանում ելույթի ժամանակ Վալսը կներկայացնի քաղաքական կուրսի հիմնական դրույթները, որից հետո կառավարության վստահության հարցը կդրվի քվեարկության: Այն չորրորդն է իշխանության ղեկին սոցիալիստների գտնվելու երկու տարում և երկրորդը՝ Վալսի ղեկավարության ներքո:
Քվեարկության արդյունքները Ֆրանսիայում հատուկ հետաքրքրություն են առաջացնում, քանի որ Վալսին մտադիր են չաջակցել շատ սոցիալիստ պատգամավորներ, ովքեր դեմ են կառավարության քաղաքականությանը, հատկապես տնտեսության, հարկահավաքության և սոցիալական վճարներին առնչվող հարցերում:
Հաջող ելքի համար անհրաժեշտ է, որ վարչապետը ստանա ստորին պալատի 577 պատգամավորների մեծամասնության աջակցությունը: Սոցիալիստներն Ազգային ժողովում զբաղեցնում են 290 պատգամավորական աթոռ: