«Օրինաց երկիր» խմբակցությունը սեպտեմբերի 29-ին արտահերթ նիստ է հրավիրում: Խմբակցությունը ցանկանում է, որ այդ օրը քննարկվի իրենց ներկայացրած օրինագծերի փաթեթը, որը վերաբերում է հիմնականում երթևեկության կանոնների խախտման հետևանքով վարորդների նկատմամբ ոստիկանության կիրառած տուգանքների պատճառով նրանց բանկային հաշիվները կալանքի տակ առնելու խնդրին: Հիշեցնենք, որ այդ խնդրի պատճառով այսօր հարյուր հազարավոր մարդկանց բանկային հաշիվներն ամբողջությամբ գտնվում են կալանքի տակ, և նրանք չեն կարողանում օգտվել իրենց գումարներից:
Ճիշտ է, անցյալ շաբաթ Հանրապետական խմբակցության անդամ Արփինե Հովհաննիսյանը նույնպես նույն խնդրի վերաբերյալ նախագիծ էր ներկայացրել, և այն ընդունվեց, բայց դա հարցը մասամբ է լուծում: ՀՀԿ-ական պատգամավորի օրինագիծն առաջարկում է կալանք դնել քաղաքացու ոչ թե ողջ բանկային հաշվի վրա, այլ այնքան մասի, որքան կազմում է տուգանքի չափը: Ա. Հովհաննիսյանի նախագիծը փորձում է ավելի հստակեցնել ծանուցման մեխանիզմները, որպեսզի քաղաքացին պատշաճ ձևով տեղեկացված լինի իր կատարած խախտման, դրա տուգանքի չափի կամ դրա հետ կապված դատական գործընթացի մասին: Բայց Ա. Հովհաննիսյանի նախագիծը հարցն ամբողջությամբ չի կարգավորում:
ՕԵԿ-ի օրինագիծը առաջարկում է մարդկանց գույքի վրա կալանք չդնել ոստիկանության դիմումով և դատական ակտերի հարկադիր կատարողի պահանջով: Այժմ գործում է այնպիսի մեխանիզմ, որ ոստիկանությունը դիմում է ԴԱՀԿ-ին, վերջինս էլ որոշում է ընդունում ու կալանքի տակ առնում քաղաքացիների բանկային հաշիվները: ՕԵԿ-ը «Դատական ակտերի հարկադիր կատարման մասին», «Վարչական հիմունքների և վարչական վարույթի մասին» օրենքներում լրացումներ և փոփոխություններ կատարելու մասին նախագծերով առաջարկում է մարդկանց հաշիվները կալանքի տակ առնել ոչ թե ԴԱՀԿ-ի որոշման, այլ միայն դատարանի որոշման հիման վրա: Եվ խնդիրն այս դեպքում չի վերաբերում միայն ճանապարհային երթևեկության կանոնների խախտումների հետևանքով գոյացած տուգանքներին ու բանկային հաշիվները կալանքի տակ առնելուն: ՕԵԿ-ի նախագիծն ավելի ընդհանրական է և ենթադրում է՝ ընդհանրապես մարդկանց սեփականությունը առանց դատարանի որոշման չպետք է կալանքի տակ առնել: Հակառակ դեպքում դա կդառնա հակասահմանադրական քայլ, ինչը արվում է ավելի քան կես տարի:
Հարկ է նաև նշել, որ անցած տարեվերջին, երբ կառավարությունը Ազգային ժողով էր ներկայացրել վերը նշված օրենքներում փոփոխություններ անելու նախագիծը, որի համաձայն՝ քաղաքացիների գույքը կալանքի տակ առնելու համար դատարանի վճիռը պարտադիր չէր, և բավարար էր միայն ԴԱՀԿ-ի որոշումը, ՕԵԿ-ը՝ որպես կոալիցիայի անդամ, կողմ էր քվեարկել դրան: Իսկ հիմա, երբ այդ կուսակցությունն արդեն ընդդիմություն է, հակառակ նախաձեռնությունն է ներկայացրել:
Ավելացնենք նաև, որ վեր նշված օրինագծերը քննարկելու համար արտահերթ նիստ հրավիրելու համար ստորագրահավաքն ՕԵԿ-ն արդեն իրականացրել է և համապատասխան թերթիկն այսօր հանձնել է ԱԺ քարտուղարություն: Ստորագրահավաքին մասնակցել են ոչ իշխանական «Բարգավաճ Հայաստան», «Դաշնակցություն», «Ժառանգություն», ՀԱԿ խմբակցությունների, ինչպես նաև ՕԵԿ-ի 44 պատգամավորներ: Արտահերթ նիստը տեղի կունենա սեպտեմբերի 29-ի երեկոյան, հերթական նիստից անմիջապես հետո:
