«Հյուսիսային Իրաքից Թուրքիա փախած եզդիները ցանկություն ունեն, պատրաստ են Հայաստան գալու»,- «Առաջին լրատվական»-ի հետ զրույցում ասաց «Սինջար» եզդիների ազգային միավորման խորհրդի ղեկավար Բորիս Մուրազինը՝ հավելելով, որ անհրաժեշտ ճանապարհները չկան, միայն պետության կամքի դեպքում կարող են այդ խնդիրները լուծվել: Իրաքի թուրքական սահմանի եզդիական գյուղեր այցելության ժամանակ Հայաստանում բնակվող եզդիները դրամահավաքի արդյունքում մոտ 10 հազար ԱՄՆ դոլար հավաքված գումարով 25 վրան են որպես օգնություն տվել. վրանները հնարավոր է օգտագործել նաև ձմռանը, դրանք շուրջ 150 մարդկանց համար են նախատեսված:
Ըստ Բորիս Մուրազինի՝ սկզբում որոշել էին սնունդ գնել, բայց հետո տեսան, որ Թուրքիայում սնունդը քիչ թե շատ ապահովված է, եզդիների խնդիրը մեծամասամբ կացարանի հետ է կապված. այգիներում են գիշերում: Բորիս Մուրազինը նաև ընդգծեց, որ Թուրքիայում հայտնված շուրջ 30 հազար եզդի փախստականները վստահ չեն, որ հալածանքների չեն ենթարկվի։ «Ինչպես 74 թ. կիրառեց Բաթմանի եզդիների նկատմամբ, հարկ եղած դեպքում մուսուլմանական, ծայրահեղ իսլամիստների շահերն է պաշտպանելու»,- ասաց նա: Բ. Մուրազինը նաև ընդգծեց, որ եզդիները մաքսիմալ հիսթափված են քրդական կառավարությունից. մեղադրում են դավաճանության մեջ, քանի որ Շանգալի վրա առաջին հարձակման օրը քրդական զորքերը հետ են քաշվել, մինչդեռ կոչված էին պաշտպանելու, բացի այդ՝ եզդիներին ժամկետն անց սնունդ են հատկացրել: Հյուսիսային Իրաքի եզդիների համոզմամբ՝ այս իրավիճակում նավթային շահերն են պաշտպանվում: Բացի այդ՝ տարվում է հատուկ քաղաքականություն եզդիների թիվը նվազեցնելու ուղղությամբ:
Այս պահին Հյուսիսային Իրաքում բնակվող եզդիներին առաջին հերթին զենք է անհրաժեշտ։ «Ապացուցեին, որ զենք ունենալու դեպքում կարող են հակահարձակում իրականացնել, պաշտպանվել, 3-4 օր առաջ 5 գյուղ են ազատագրել»,- եզրափակեց Բորիս Մուրազինը:
Առավել մանրամասն՝ տեսանյութում։
