Malaysia Airlines ավիաընկերությունը, որն այս տարի ավիաաղետների հետևանքով կորցրել է երկու ինքնաթիռ, վերաբրենդավորման շրջանակներում կազմակերպել է «Մահվանից առաջ իմ ցանկությունների ցուցակը» (My Ultimate Bucket List) մրցույթը: Այս մասին հայտնում է The Huffington Post-ը:
Պարբերականը նշում է, որ մրցույթի անվանումը վրդովմունք է առաջացրել համացանցում՝ հաշվի առնելով ընկերության ինքնաթիռների աղետները: Bucket List-ն անգլերենից թարգմանաբար նշանակում է ցուցակ այն ամենի, ինչ մարդ ուզում է անել, տեսնել կամ ինչին ցանկանում է հասնել մահվանից առաջ:
Մրցույթին կարող են մասնակցել միայն Ավստրալիայի և Նոր Զելանդիայի բնակիչները: Մասնակիցները պետք է պատմեն՝ որտեղ և ինչ կուզենային տեսնել մահվանից առաջ: Տեքստը պետք է լինի 500 բառից ոչ ավելի: Մրցանակներից են՝ iPad պլանշետ և էկոնոմ դասի տոմս Մալայզիայի ցանկացած կետ, որը կորոշի ընկերությունը: Ներկայումս մրցույթի հղումն ընկերության կայքում չի բացվում: Ըստ երևույթին, մամուլի արձագանքն ազդել է ավիափոխադրողի որոշման վրա:
Հիշեցնենք՝ Malaysia Airlines-ի առաջին անհետացած ինքնաթիռը Boeing 777-ն էր: Կուալա-Լամպուրից Պեկին թռչող ինքնաթիռը՝ 227 ուղևորով և անձնակազմի 12 անդամներով, անհետացել է մարտի 8-ին:
Մյուս Boeing 777-ն իրականացնում էր Ամստերդամ-Կուալա-Լամպուր չվերթը: Ինքնաթիռը կործանվել է հուլիսի 17-ին՝ Ուկրաինայի արևելքում: Ինքնաթիռում եղել է 298 մարդ, բոլորը զոհվել են: