«Հրապարակ» թերթը զրուցել է Սպորտի և երիտասարդության հարցերի նախկին նախարար, ներկայում ՀԱՕԿ գլխավոր քարտուղար Հրաչյա Ռոստոմյանի հետ:
– Սպորտին զուգահեռ՝ տեղափոխվեցիք նաև քաղաքական դաշտ, դարձաք ԲՀԿ անդամ, որոշ ժամանակ անց՝ նորից դուրս եկաք կուսակցությունից։ Կասե՞ք, թե ինչու անդամակցեցիք այդ կուսակցությանը։
– Անդամակցումը շատ պարզ էր, պարոն Ծառուկյանի գործոնով է պայմանավորված։ Ճանաչելով այն ներդրումները, այն հսկայական ծավալի աշխատանքները, որ պարոն Ծառուկյանը կատարում է մեր սպորտի համար, իմանալով, որ այդ ամենն ինքն անում է իր անձնական գումարներով, այն գումարներով, որ ինքը կարող է ծախսել իր անձնական կարիքների վրա, բայց էդ մարդը կտրում ա, տալիս ա հայանպաստ, պետության կայացման համար շատ կարևոր ոլորտին, բնականաբար, էդ անձնավորության հետ շատ երկար ճանապարհ կարելի ա անցնել։ Ու այդ ամենը վստահություն է ներշնչում, որ ուրիշ ձևաչափով, ուրիշ մոտեցումով պարոն Ծառուկյանը ցույց կտա նաև այն ոլորտներում, որոնք Հայաստանում կաղում են։
– Այսինքն՝ Հայաստանում սպորտի զարգացումը միայն Գագիկ Ծառուկյանի անձո՞վ է պայմանավորված։
– Այս պահի դրությամբ՝ այո։ Պարոն Ծառուկյանի ֆակտորը, պարոն Ծառուկյանի մոտեցումները… էն, որ ծանոթ-բարեկամն էսօր կապ չունի, եթե արժանի է, ինքը գնում ա մրցմանը, դա նույնպես պարոն Ծառուկյանի ֆակտորն ա։ Ես չեմ ուզում շատ խորանամ՝ անցյալում ինչեր ա եղել, դա անցյալում ա, հիմա նման բան չկա։
– Իսկ ինչո՞ւ դուրս եկաք կուսակցությունից։
– Հարցը հետևյալն էր՝ երբ որ ինձ առաջարկվեց նախարարի պաշտոն, սպորտն ապաքաղաքական ոլորտ է, և սպորտի ու երիտասարդության հարցերի նախարարի պաշտոնն էլ ապաքաղաքական պաշտոն էր, բնականաբար, պիտի նախարարն անկուսակցական լիներ։
– Դուրս եկաք ԲՀԿ-ից՝ չդավաճանելով կուսակցության արժեքների՞ն։ Կարելի՞ է ասել՝ հոգով շարունակում եք մնալ ԲՀԿ-ական։
– Ես հոգով պարոն Ծառուկյանի հետ եմ։ Բայց ասեմ՝ պարոն Ծառուկյանի հետ որևէ բարեկամական կապ չեմ ունեցել։
Հարցազրույցն ամբողջությամբ՝ թերթի այսօրվա համարում