Ղազախստանը դարձել է Ռուսաստանի հերթական հարևանը, որը վախենում է կրկնել Ուկրաինայի, Չեչնիայի և Վրաստանի ճակատագիրը՝ ասվում է The Guardian-ի հոդվածում: Հոդվածագիրը նշում է, որ դա տեղի է ունենում ՆԱՏՕ-ի օգնությամբ Բալթյան երկրների պաշտպանության մասին ԱՄՆ նախագահ Բարաք Օբամայի հայտարարությունների ֆոնին:
Որոշ ժամանակ առաջ Օբաման հայտարարել էր, որ Արևելյան Եվրոպայի երկրները, այդ թվում՝ Լեհաստանը, Էստոնիան, Լատվիան, Լիտվան և Ռումինիան «երբեք մենակ չեն մնա»:
Սակայն հոդվածագրի կարծիքով՝ անհրաժեշտ է ուշադրություն դարձնել նաև Ղազախստանի վրա, որի մասին Ռուսաստանի նախագահ Վլադիմիր Պուտինը կարծիք է հայտնել, թե Ղազախստանի նախագահ Նուրսուլթան Նազարբաևը «յուրահատուկ բան է արել՝ պետություն է ստեղծել տարածքում, որտեղ երբեք պետություն չի եղել»: «Այս իմաստով նա հետխորհրդային պետականության համար յուրահատուկ մարդ է»,- նշել է Պուտինը (մեջբերումը՝ Ria Novosti-ից):
Հոդվածի հեղինակը հիշեցնում է, որ 1991-ին՝ ԽՍՀՄ-ի փլուզումից հետո, մոտ 25 մլն ռուսներ դարձել են հետխորհրդային հանրապետությունների քաղաքացիներ Ռուսաստանի սահմաններից դուրս: Այդ ժամանակվանից Մոսկվան հաճախ է «սեփականատիրական» վերաբերմունք դրսևորել Ռուսաստանի հարևանների նկատմամբ՝ որպես ճնշման լծակ օգտագործելով առևտուրն ու էներգետիկան՝ ասվում է հոդվածում: Որպես օրինակ հեղինակը մեջբերում է Վրաստանի, Ուկրաինայի և Չեչնիայի հետ Ռուսաստանի հարաբերությունները:
Ավելի վաղ Նազարբաևը հայտարարել էր, որ Ղազախստանը կարող է դուրս գալ ԵՏՄ-ի կազմից: