Հնդկաստանում կինը հղիության իններորդ ամսում, որպեսզի հիվանդանոց հասնի, ստիպված է եղել կյանքը վտանգի ենթարկել: Նա անցել է գետը՝ դրա համար օգտագործելով չորացրած դդում՝ հաղորդում է BBC-ին:
Այդ ամենը տեղի է ունեցել մուսոնների շրջանում, երբ գետում ջրի մակարդակը բարձրանում է 3-4 մետրով, և նույնիսկ փորձառու լողորդները խուսափում են այդ շրջանում լողալ: Նա նման քայլի է դիմել հանգամանքներից ելնելով. փոքրիկ գյուղը, որտեղ նա ապրում է, տեղակայված է կղզու վրա, այդ պատճառով աշխարհի հետ կապ հաստատելու համար մարդիկ պետք է լողան:
Հենց այդպես է արել 22-ամյա Ելավան: Որպեսզի չխեղդվի, նա օգտագործել է չորացրած դդումից պատրաստված տարան: Դրա միջոցով կինը կարողացել է լողալ մոտ 1 կմ և հասել է մոտակա բնակավայրին, որտեղ հիվանդանոց կա: Լողալու ընթացքում նրան ուղեկցել են հայրը, եղբայրը և զարմիկները:
Հիվանդանոցի բժիշկները ապշել էին կնոջ քաջությամբ: Չնայած որ նա ծննդաբերել էր մասնավոր հիվանդանոցում, բայց բժիշկները հայտարարել են, որ նրանից գումար չեն վերցնի: Բացի դրանից՝ կինն ինքը չէր էլ կարող վճարել, քանի որ նրա ընտանիքը շատ աղքատ է:
