«Իսլամական պետության» ծայրահեղականները դարձել են մուլտֆիլմերի նմանակ հերոսներ: Դրանք արաբական հեռուստաալիքների եթերում հաջող ցուցադրությունից հետո տեղադրել են համացանցում: Այս մասին հայտնում է Associated Press-ը: Դրանցից մեկի հերոսն անշնորհք գրոհային է, որը, փորձելով հրթիռ արձակել Իրաքի ուղղությամբ, շարժական զենիթահրթիռային համալիրը գցում է իր հրամանատարի ոտքին:
Վերջերս Մերձավոր Արևելքի երկրներում ստեղծվել են շատ երգիծական ծրագրեր, որոնցում ծաղրում են իսլամիստներին: ««Իսլամական պետության» գրոհայինները ձևավորում են սխալ վերաբերմունք իսլամի հանդեպ, ուստի ծաղրելով նրանց՝ մենք ցույց ենք տալիս, որ հանդես ենք գալիս ծայրահեղականների դեմ»,- ասել է լիբանանյան երգիծական Ktir Salbe Show-ի սցենարիստներից և պրոդյուսերներից մեկը՝ Նաբիլ Ասաֆը:
Այսպես. այդ շոուի սերիաներից մեկում տաքսու վարորդը տեղափոխում է ջիհադիստի, որը հրաժարվում է ռադիո լսել՝ ասելով, թե «իսլամական վաղ ժամանակներում այն գոյություն չի ունեցել»: Նույն պատճառով իսլամիստը չի ընդունում օդափոխիչը, բջջային հեռախոսը: Ի վերջո՝ տաքսու վարորդը նրան հարցնում է՝ արդյոք նախկինում տաքսի եղե՞լ է, գրոհայինը պատասխանում է. «Ոչ, հազար անգամ ոչ»: Այդ ժամանակ վարորդը դուրս է հանում ուղևորին ու ասում, որ ուղտի սպասի: