«Իսլամական պետություն» ահաբեկչական խմբավորման գրոհայինների տրամադրության տակ Սիրիայում կարող են հայտնվել գերմանա-ֆրանսիական արտադրության հակատանկային հրթիռներ: Այս մասին հայտնում է Die Welt թերթի էլեկտրոնային տարբերակը:
Համացանցում հայտնվել է տեսանյութ, որում «Իսլամական պետության» ծայրահեղականները ցուցադրում են HOT տիպի հրթիռներ, որոնք նախատեսված են զրահամեքենայի և պաշտպանված օբյեկտների ոչնչացման համար: Պարբերականը նշում է, որ գրոհայինները դրանք գրավել են Տաբակա քաղաքի մոտ գտնվող ռազմական օդանավակայանի համար մարտերի ժամանակ:
Այդ տիպի հրթիռները մշակել է Euromissile նախկին գերմանա-ֆրանսիական կոնսորցիումը: Die Welt-ի տեղեկությամբ՝ դրանք Սիրիայի կառավարությանն են փոխանցվել 1981թ.: