Եվրոպայի խոշորագույն Alitalia ավիաընկերությունը հնարավոր է՝ առաջիկայում դադարեցնի չվերթները Հայաստանից և դեպի Հայաստան: Պատճառն այն է, որ վերջին շրջանում Հայաստանում Իտալիայի դեսպանատունն անհարկի խոչընդոտներ է ստեղծում վիզաների ձեռքբերման հարցում: Երևանում գործող տարբեր զբոսաշրջային գործակալություններում մեր աղբյուրները հայտնում են, որ դեսպանատունը հարկի և անհարկի մերժում է վիզաներ տրամադրել ՀՀ քաղաքացիներին, իսկ ավիաընկերությունը, համապատասխանաբար, անգամ 50 տոկոսով չի կարողանում ուղևոր հավաքել:
Հիշեցնենք, որ ավիաընկերությունը դեպի Հայաստան կանոնավոր չվերթներ սկսեց իրականացնել 2012 թվականի նոյեմբերից: Չվերթներն իրականացվում էին շաբաթական երկու անգամ: Դեռևս այդ ժամանակ, երբ սկսվեց համագործակցությունը, Հայաստանում Իտալիայի Հանրապետության այդ ժամանակվա արտակարգ և լիազոր դեսպան Բրունո Սկապինին որոշումը «պատմականորեն կարևոր» էր որակել, որը պետք է «հանգրվան դառնար Իտալիայի և Հայաստանի հարաբերություններում»:
«Իտալիայի և Հայաստանի միջև թռիչքները կատարելագործելու և ամրապնդելու են երկու երկրների միջև գոյություն ունեցող ջերմ հարաբերությունները»,- ասել էր Սկապինին՝ ընդգծելով, որ Իտալիայի և Հայաստանի միջև ուղիղ կապը հրատապ անհրաժեշտություն է՝ ելնելով այն բանից, որ Հայաստան այցելող եվրոպացի զբոսաշրջիկների մեջ առաջին տեղը զբաղեցնում են իտալացիները: «Ալիտալիա» ավիաընկերության կողմից Հռոմ-Երևան-Հռոմ չվերթի իրականացումը հնարավորություն է ընձեռում ուղևորներին ճանապարհորդել ավիաընկերության կողմից իրականացվող բոլոր երթուղիներով` Հռոմի օդանավակայանն օգտագործելով որպես տարանցիկ կետ:
Սակայն պարզվում է, որ հենց այս հանգամանքն է իր հերթին խոչընդոտ հանդիսացել, որպեսզի այլևս նույն քանակությամբ վիզաներ չտրամադրվեն դիմողներին: Վիզաների կտրուկ մերժումներն ավելացել են հատկապես վերջին շրջանում, երբ Իտալիայի Հանրապետության ԱԳՆ-ի հրահանգով Հայաստանում Իտալիայի դեսպանատանը համատարած ստուգումներ են սկսվել: Այդ ստուգումների արդյունքում պարզվել է, որ դեսպանատունը շատ հաճախ է հաստատում քաղաքացիների վիզաները, և ուսումնասիրությամբ պարզվել է, որ Իտալիայի դեսպանատուն դիմած քաղաքացիների մեծ մասն այն օգտագործել է որպես տարանցիկ ճանապարհ այլ երկրներ և քաղաքներ գնալու համար: Ստուգումներից հետո կոնկրետ հրահանգ է եղել սահմանափակել վիզաների տրամադրումը:
Նշենք, որ Alitalia ավիաընկերությունը Հայաստանում հիմնվեց և աշխատում էր մասնավորի, մասնավորապես ԲՀԿ առաջնորդ Գագիկ Ծառուկյանի ջանքերով: Դրա համար էլ վերջերս Գագիկ Ծառուկյանն արդեն նոր դեսպանի կողմից պարգևատրվեց Իտալիայի նախագահի ոսկե մեդալով: Մեդալը Ծառուկյանին շնորհվեց «հայ-իտալական հարաբերությունների զարգացման հարցում մեծ դերակատարություն ունենալու համար»: Գումարը Ծառուկյանը տվել էր դեսպանի երաշխավորությամբ:
Իտալիայի դեսպանատան ստեղծած խոչընդոտները պարզապես կնպաստեն այն բանին, որ քաղաքացիներն այլևս Իտալիա մեկնելու համար այլ տարանցիկ ճանապարհներ որոնեն:
