Օրեր առաջ քաղաքականություն վերադառնալու հերթական ակնարկներով հարցազրույց տվեց ՀՀ երկրորդ նախագահ Ռոբերտ Քոչարյանը: Դրան հաջորդեց վերջինիս ծննդյան 60-ամյակին նվիրված ֆիլմը, որը պատմում էր Քոչարյանի նախագահության տարիների «դրախտի» մասին:
Ի դեպ, ֆիլմը ցուցադրվեց ԲՀԿ առաջնորդ Գագիկ Ծառուկյանին պատկանող «Կենտրոն» հեռուստաալիքով: Անմիջապես հետո Ծառուկյանն անձամբ շնորհավորեց Քոչարյանին՝ բարձր գնահատելով վերջինիս ավանդը Հայաստանի և Արցախի կայացման գործում:
Բնականաբար, ֆիլմում խոսք չկար անգամ Հոկտեմբերի 27-ի, Մարտի 1-ի ոճրագործություններում վերջինիս մասնակցության, նրա դրախտային կառավարման տարիների ընթացքում մամուլի անազատության և մի շարք այլ իրողությունների վերաբերյալ:
2008 թվականի Մարտի 1-ի ոճրագործության զոհ Գոռ Քլոյանի մոր՝ Ազատուհի Քլոյանի խոսքերով՝ Քոչարյանի երազանքն է փակել այդ էջերը ու վերադառնալ քաղաքականություն, բայց դա նրան չի հաջողվի․ «Սերժ Սարգսյանը երբ ավարտեց նախագահությունը, Ձեզ թվում է՝ ո՞վ է գալու նրանից հետո: Բայց ինձ չի թվում՝ նա այդքան երես կունենա, այդքան պադոշ կլինի, որ գա նորից ղեկավարի կամ մտնի քաղաքականություն: Բա Մարտի 1-ը, բա Հոկտեմբերի 27-ը, բա Գոռ Քլոյանի արյունը ո՞ւմ ճակատին քսեմ, ինքը պետք է գա ու մատաղ լինի իմ երեխուն»:
Տիկին Ազատուհին անդրադարձավ նաև «Կենտրոն»-ով ցուցադրված ֆիլմին և ասաց․ «Բայց ինչո՞ւ է Ձեզ թվում, թե մենք վստահում ենք «Բարգավաճ Հայաստան» կուսացկությանը: ԲՀԿ-ն հիմնվելէ Ռոբերտ Քոչարյանի օրոք, նա է դրա պարագլուխը, Քոչարյանի 60-ամյակն էլ երևի ուրախությունն ու չգիտեմ ինչն էր, որ շնորհավորեց: Դա Քոչարյանի կուսակցությունն է՝ Գագիկ Ծառուկյանի ղեկավարությամբ: Բառեր չեմ գտնում ասելու, ես չեմ էլ կասկածում դրանում: Բոլորն էլ կսատարեն, նրանք բոլորը ծաղրածու են, ինչի՞ մասին է խոսքը: Ի՞նչ քաղաքականություն, Հայաստանը բեմ է, դրանք էլ դերասաններ, ով կարողանում է՝ լավ խաղում է: Իմ նման մայրերն էլ նստել սպասում են, որ այս երկրում արդարություն կլինի: Նրանց նմաններն են հաղթանակով առաջ գնում, ոչ թե իմ նման որդեկորույս մայրերը, որ սպասում են բացահայտման»:
Մեր զրուցակիցն ավելացրեց, թե ցավն այն է, որ այդ գործիչները միշտ կարողանում են ամեն ինչի տակից դուրս գալ:
