Կիպրոսի Հանրապետության կառավարությունը անօրինական է համարել Թուրքիայի նախագահ Ռեջեփ Թայիփ Էրդողանի այցը Հյուսիսային Կիպրոս և դատապարտել է Էրդողանի այն հայտարարությունը, թե անհրաժեշտ է լուծել Կիպրոսի հիմնախնդիրը՝ ստեղծելով երկու իրավահավասար պետություն: Այս մասին գրում է ITAR-TASS-ը՝ հղում անելով հանրապետության կառավարության պաշտոնական ներկայացուցիչ Նիկոս Քրիստոդուլիդիսին:
«Մենք դատապարտում ենք Կիպրոսի հիմնախնդրի լուծմանն առնչվող ցանկացած հայտարարություն կամ գործողություն, որոնք գտնվում են ՄԱԿ-ի ԱԽ բանաձևի, 1977-1979 թվականների բարձր մակարդակի համաձայնությունների, ինչպես նաև համատեղ հայտարարության շրջանակներից դուրս»,- ընդգծել է Քրիստոդուլիդիսը:
Փաստաթղթում Քրիստոդուլիդիսն ընդգծել է, որ «Կիպրոսն անընդունելի է համարում Հունաստանին երկխոսության մեջ ներգրավելու մշտական կոչերը, որոնք արվում են պատասխանատվությունը հավասարեցնելու փորձից ելնելով, Կիպրոսի տարածքի շարունակվող բռնազավթումը, ինչում մեղավոր է Թուրքիան»:
Նրա խոսքով՝ Կիպրոսի կառավարությունը ակնկալում էր, որ «Թուրքիայի նախագահը՝ երկրի, որը ԵՄ-ին անդամակցելու թեկնածու է, նախևառաջ գործընթացի կարգավորման մեջ կներգրավի ԵՄ-ին, որի անդամն է Կիպրոսի Հանրապետությունը և կմնա նաև հիմնախնդրի լուծումից հետո»: