Նախախորհրդարանի համակարգող Գարեգին Չուգասզյանի կարծիքով՝ Քոչարյանը որպես քաղաքական գործիչ ավարտվել է: Նրա խոսքերով՝ ամբողջ հայ ժողովուրդը կարիք ունի իր վերնախավի նորացման, որը պետք է իր մեջ ներառի հիմնականում երիտասարդ, հայաստանակենտրոն ուժերին:
«Որևէ հույս կապել հին ադմինիստրատիվ ուժերի հետ, որոնք Հայաստանը սնանկացրել են, այս վիճակին են հասցրել… ես կարծում եմ՝ այստեղ Ռոբերտ Քոչարյանը նույնպես անելիք չունի»,- հավելեց նա:
Անդրադառնալով Նախախորհրդարանի գործունեությանը՝ նա նշեց, որ իրենց գործունեությունը համարում են քաղաքական, ուրիշ հարց, որ գոյություն ունեցող քաղաքական դաշտը համարում են դեկորատիվ, որովհետև այն ընթացքը, որ թևակոխել է Հայաստանը, ցույց է տալիս, որ շատ ավելի արմատական փոփոխությունների կարիք կա, և այդ արմատական փոփոխությունները պայմանավորված են թե՛ միջազգային իրավիճակի փոփոխմամբ և թե՛ ներքին իրավիճակի փոփոխմամբ:
«Դրա համար մենք միշտ բաց ենք եղել ներքին համագործակցության համար քաղաքական ուժերի համար, բայց դա չի նշանակում, որ ընդունել ենք կեղծ «քաղաքական խաղի» օրենքները»,- ասաց մեր զրուցակիցը:
Անդրադառնալով հարցին՝ արդյոք եթե սեպտեմբերից ոչ իշխանական քառյակն ակտիվանա, հանրահավաքային փուլ մտնի, նախախորհրդարանը կմիանա՞, Գարեգին Չուգսզյանը նշեց, որ իրենք, բաց լինելով ցանկացած քաղաքական ուժի հետ աշխատանքի համար, միշտ պայման են դնում, որ արդյունքը հստակ լինի, բայց տվյալ դեպքում հսականալի է, որ կուսակցությունները և ամբողջ քաղաքական դաշտը սնանկացած վիճակում են Հայաստանում, ինչը, սակայն, չի նշանակում, որ Հայաստանում քաղաքական պրոցես չի լինելու:
«Այն ընթացքը, որում նախախորհրդարանը զբաղված է, նոր տիպի արմատական ընդդիմության ստեղծման գործընթացն է, և մենք ելնում ենք այն հանգամանքից, որ ապակայունացումը, որը թե՛ հյուսիսում և թե՛ հարավում տեղի է ունենում, Հայաստանում հանգեցնելու է նոր քաղաքական դաշտի ստեղծման»,- ասաց նա՝ հավելելով, թե իրենք հասկանում են, որ բոլոր մտահոգ ուժերը որոշակի հարթակի շուրջ պետք է համագործակցեն, այնպիսի հարթակի շուրջ, որը կարող է լինել Հիմնադիր խորհրդարանը, որի ձևավորումը կավարտվի մինչև աշնան վերջը, և զուգահեռ կարծում են, որ մի ուրիշ հնարավորություն է միավորումը այն մարտահրավերների հանդիման, որոնց առջև կանգնած է Հայաստանը:
Նրա դիտարկմամբ՝ մտահոգ քաղաքացիները պետք է հասկանան, որ Հայաստանը չունի ռազմավարական տարածքի խորություն, և ամբողջ ժողովուրդը պետք է պատրաստ լինի՝ պաշտպանելու հայրենիքն այն հնարավոր մարտահրավերներից, որ առկա են տարածաշրջանում։
«Մենք հասել ենք կարմիր գծին, մեկ հարց գոյություն ունի՝ ինքնիշխանության հարցը Հայաստանում, որովհետև արտակարգ իրավիճակում ենք հայտնվել, և այդ արտակարգ իրավիճակին արտակարգ լուծումներ են պետք: Ավանդական լուծումները՝ հերթական կամ արտահերթ ընտրություններ, ինչ-որ անձի փոփոխություն, խնդիրը չեն լուծելու»,- ասաց նա:
Կա գիտակցող մի զանգված, որը, նրա խոսքով, պետք է միավորվի, հետո մնացած ժողովրդին համախմբի։ Բոլոր արտակարգ իրավիճակներում արտակարգ լուծումներ են պետք, և ինչքան մենք ավելի շուտ ազատվենք քաղաքական ուժերի դեկորատիվ առաջնորդությունից, այնքան ավելի շուտ ճանապարհը կգտնենք:
Ավելին՝ տեսանյութում:
